لاہور (آن لائن) مسلم لیگ (ن) کے رہنما کیپٹن (ر) محمد صفدر نے کہا ہے کہ میں سپریم کورٹ کی بنائی گئی جے آئی ٹی کے روبرو اثاثے بتا چکا ہوں، کیا سپریم کورٹ سے اوپر بھی کوئی ادارہ ہے ،یہ اب کفن سے متعلق بھی پوچھنے لگ گئے ہیں،جو بیرون ممالک سے محنت مزدوری کر کے پیسے بھیج رہے ہیں ان کو بھی ڈرا رہے ہیں
،مجھ سے پوچھتے ہیںکہ میراذریعہ آمدن کیا ہے ،فیلڈ مارشل کی اولا بتا دے کے اس کے آبائواجداد کے اثاثے کتنے ہیں۔ عدالت میں پیشی کے موقع پر میڈیا سے گفتگو کرتے ہوئے کیپٹن (ر) محمدصفدر نے کہا کہ ترقی کرنا ہر ایک کا حق ہے،میں تو 300 سال پیچھے کا ریکارڈ دے رہا ہوں ،یہ مجھے نااہل قرار دینا چاہتے ہیں ،میںپاکستان کے لئے اہل ہوں ۔ انہوں نے کہا کہ آج تو پاکستان میں پٹواریوں کی حکومت ہے ،ہر ایک شخص کی زندگی میں ایک ناں ایک فلم بنی ہوئی ہے ،یہ سب چابی گروپ ہے ،میں سیاسی حالات اور موجودہ صورتحال پر کتاب لکھ رہا ہوں۔ انہوں نے کہا کہ جو اللہ سے ڈرتا ہے وہ کسی سے نہیں ڈرتا ،یہاں میری باتیں ریکارڈ کی جاتی ہیں، میرے خلاف کیسز حساس ادارے کا سربراہ بنو ارہا ہے ، جسٹس وقار سیٹھ کا حکم نامہ موجود ہے ، آج بھی ایسے جج زندہ ہیں،آپ کو ہر جج جسٹس منیر اور ملک ارشد نہیںملے گا۔ انہوں نے کہا کہ وہ کون کیمرہ مین تھا جو میری فلم بنا رہا تھا اسے کون ہدایات دے رہا تھا کہ گھسیٹ کے لائو۔ ا نہوں نے کہا کہ انہوں نے مادر ملت کو بھی گھسیٹا ہم بھی تیار ہیں،آج جو مادر ملت کی بات کرتا ہے وہ غدار کہلائے گا،ہمیں کہتے ہیں گوجرانوالہ سے گزرو گے تو پتھرائو ہوگا،مجھے بتایا جائے کہ کراچی میںدروازہ کس کے کہنے پر توڑا گیا۔
