لاہور(پ ر) وزیراعلیٰ پنجاب کی معاون خصوصی ڈاکٹر فردوس عاشق اعوان نے کہا ہے کہ پی ڈی ایم تیزی سے اپنے عبرتناک انجام کی جانب بڑھ رہا ہے اور کرپشن زدہ ٹولہ جلد خزاں کے پتوں کی طرح بکھر جائے گا۔ ایک بیان میں انہوں نے کہا کہ

مینار پاکستان جیسے مقدس مقام پر اپوزیشن عناصر کی غلاظت کو پوری قوم نے دیکھا اور اب قانون اپنا راستہ خود لے رہا ہے اور انسداد کورونا آرڈیننس کی خلاف ورزی پر قانونی کارروائی جاری ہے۔انہوں نے کہا کہ راجکماری اور کنیزوں کے مایوس چہرے ناکامی کی داستان بیان کر رہے ہیں اور اس عاقبت نا اندیش ٹولے نے اپنی ہٹ دھرمی سے عوام کو کورونا میں مبتلا کرنے کی پوری کوشش کی۔ ڈاکٹر فردوس عاشق اعوان نے کہا کہ پنجاب میں 24 گھنٹے میں کورونا کے 57 مریض جاں بحق ہوئے اور کورنا کے 597 مریض سامنے آئے۔ پنجاب میں کورونا کے مریضوں کی تعداد 128138 ہو گئی ہے جبکہ لاہور میں مریضوں کی تعداد 62483 تک پہنچ چکی ہے۔ انہوں نے کہا کہ اپوزیشن کورونا پر قابو پانے کی کوششوں کو سبوتاژ کر رہی ہے۔ عوام کے تعاون سے کورونا کے ساتھ کورونا پر منفی سیاست کرنے والوں کو بھی شکست دیں گے۔

موضوعات:فردوس عاشق اعوان