کراچی(این این آئی) ایسوسی ایشن آف بلڈرزاینڈ ڈیولپرز(آباد)کو ملک کے 5 بڑے شہروں میں بلند و بالا عمارتوں کی تعمیرات کی اجازت مل گئی ہے۔ خصوصی گفتگو کرتے ہوئے چیئرمین کمیٹی برائے ہائی رائز بلڈنگ حسن بخشی نے کہا کہ

کراچی سمیت ملک کے 5 بڑے شہروں میں 300 فٹ سے اونچی عمارتیں تعمیر کرنے کی اجازت مل گئی۔انہوں نے کہا کہ ڈیولپرز کے وفد نے اونچی عمارات کی تعمیرات کے معاملے کو وزیراعظم عمران خان سے ملاقات میں اٹھایا تھا۔۔وزیراعظم نے یقین دہانی کرائی تھی کہ 300 فٹ سے اونچی عمارتیں بنانے کی  اجازت دی جائے گی۔انہوں نے بتایاکہ  وزیراعظم نے اس حوالے سے اجازت دے دی ہے اور سمری کابینہ اجلاس میں منظوری کیلئے بھیج دی گئی۔۔ منظوری کے بعد ہائی اسٹینڈرڈ ملٹی اسٹوریج عمارتیں کراچی، لاہور،فیصل آباد، ملتان اور پشاور میں بنائی جاسکیں گی۔انہوں نے کہا کہ بلند عمارتوں کی تعمیر سے متعلق اب سول ایوی ایشن اور پاکستان ایئر فورس سے اجازت لینے کی ضرورت نہیں ہوگی۔ دونوں اداروں نے تحریری طور پر وزیراعظم کو آگاہ کردیا ہے۔ ائیرپورٹ کی چھ کلومیٹر کی حدود سے باہر ان عمارتوں کی تعمیر کی اجازت ہوگی۔