تربت (این این آئی) بلوچستان نیشنل پارٹی (بی این پی مینگل) کے رہنما سینیٹر جہانزیب جمالدینی نے کہا ہے کہ بی این پی بھی اپوزیشن اتحاد پاکستان ڈیمو کریٹک موومنٹ کی حکومت مخالف تحریک میں شامل ہوگی۔تربت میں پریس کانفرنس کرتے

ہوئے سینیٹر جہانزیب جمالدینی نے کہاکہ وفاقی حکومت کی دوغلی پالیسیوں کی وجہ سے بی این پی نے حکومت سے اپنے راستے الگ کیے، حکومت کو لاپتہ افراد کی بازیابی سمیت 6 نکات پیش کیے تھے تاہم افسوس کی بات ہے کہ 2 سال میں ہمارے 6 نکات پر کوئی پیش رفت سامنے نہیں آئی۔بی این پی رہنمانے کہاکہ ہم نے صوبے کے مختلف اضلاع کی پسماندگی کو ختم کرنے کیلئے وفاق سے 200 ارب روپے کے پیکج کامطالبہ کیا تھا تاہم بلوچستان کے بجائے سندھ اور پنجاب کو پیکج دیدیا گیا، دوسرے صوبے کو ملنے کے خلاف نہیں، بلوچستان کا حق ملناچاہیے۔ انہوں نے کہاکہ سندھ اور بلوچستان کے جزائر کو وفاق کے حصے میں شامل کرنے کی باتیں ہو رہی ہیں، اس اقدام کی مذمت کرتے ہیں اور اسے عدالت میں چیلنج بھی کریں گے۔