اسلام آباد (مانیٹرنگ ڈیسک )شہباز شریف کی گرفتاری کے بعد مسلم لیگ(ن) نے نئی حکمت عملی تیار کرلی۔ حکومت کے خلاف جارحانہ انداز اپنانے کا فیصلہ کیا گیا ہے جس کی توثیق آج اور کل ہونے والے اجلاسوں کے شرکاء سے کرائی جائے گی۔ نجی ٹی وی 92کی رپورٹ کے مطابق
نواز شریف نے بھائی کی گرفتاری کے بعد پارٹی معاملات اپنے ہاتھ میں لے لئے ہیں، ان کے فیصلوں کی روشنی میں مریم نواز عمل درآمد کرائیں گی ۔لیگی ذرائع کے مطابق مسلم لیگ (ن) کے قائد نواز شریف نے متعدد پارٹی رہنمائوں سے ٹیلی فونک رابطے بھی کئے ہیں۔ذرائع کے مطابق سابق وزیراعظم شاہد خاقان عباسی،احسن اقبال،مریم نواز،خواجہ آصف و دیگر رہنمائوں کو نواز شریف نے اہم ٹاسک سونپ دئیے ہیں۔پارٹی کے معاملات سابق وزیراعظم شاہد خاقان عباسی اور احسن اقبال دیکھیں گے ۔عوامی سطح پر مریم نواز متحرک ہوں گی۔پارٹی اجلاسوں کی صدارت راجہ ظفر الحق کریں گے ۔ذرائع کے مطابق پارلیمنٹ میں اپوزیشن لیڈر کی غیر موجودگی میں خواجہ آصف پارٹی کی نمائندگی کریں گے ۔ذرائع کے مطابق نواز شریف نے اہم لیگی رہنمائوں کو فوری طور پر حکومت مخالف تحریک کی تیاریوں کی بھی ہدایت کر دی ہیں۔نواز شریف نے لیگی رہنمائوں کو اپوزیشن جماعتوں سے رابطوں میں مزید تیزی لانے کی بھی ہدایت کی ہے ۔
