اسلام آباد (این این آئی) اسلام آباد لاہور موٹروے کیس پر پیپلزپارٹی نے وزیر اعلی پنجاب اور وفاقی وزیر مراد سعید سے مستعفی ہونے کا مطالبہ کردیا۔ جمعرات کو جاری اعلامیہ کے مطابق پیپلزپارٹی نے خاتون کے ساتھ پیش آنے والے افسوسناک واقعے کا
معاملہ پارلیمان میں اٹھانے کا فیصلہ کرلیا ۔ نفیسہ شاہ نے کہاکہ لاہور کے علاقے گجرپورہ موٹروے پر بچوں کے سامنے خاتون کے ساتھ ایسا واقعہ انتہائی افسوسناک اور دلخراش ہے، خاتون کے ساتھ اس واقعے کی سخت الفاظ میں مذمت کرتے ہیں۔نفیسہ شاہ نے کہاکہ پیپلزپارٹی متاثرہ خاندان کے ساتھ کھڑی ہے، واقعے کی فوری تحقیقات کرکے واقعے میں ملوث درندوں کو قانون کے کٹہرے میں لایا جائے۔نفیسہ شاہ نے کہاکہ سلیکٹیڈ حکومت نے پورے ملک کو غیر محفوظ بنا دیا ہے، اہم شاہراہوں پر اس قسم کے واقعات سلیکٹیڈ حکومت کے لئے بہت بڑا سوالیہ نشان ہے۔انہوں نے کہاکہ رپورٹس کے مطابق بار بار درخواست کے باوجود اس شاہراہ پر موٹروے پولیس کو تعینات نہیں کیا جا سکا، کہا جا رہا کہ موٹروے پولیس کی بھرتیوں سے متعلق درخواست کو کئے بار مسترد کیا گیا۔ انہوںنے کہاکہ اس تمام معاملے کی تحقیقات ناگزیر ہے، وزیر اعلی پنجاب اور متعلقہ وزیر اس واقعے کے بعد اپنی نااہلی قبول کر کے فوری مستعفی ہوجائیں۔
