اسلام آباد(مانیٹرنگ ڈیسک)پاکستان کی شہریت چھوڑ کر بھارت منتقل ہونے والے مشہورگلوکار عدنان سمیع نے یوم دفاع کے موقع پر پاکستان ایئر فورس کی تقریب میں والدہ کو مدعو نہ کرنے پر شکوہ کردیا۔اپنی ٹویٹر پوسٹ میں شکایت کرتے ہوئے عدنان سمیع نے کہا کہ میری والدہ پاکستان ایئر فورس کے سابق سکواڈرن لیڈر ارشد سمیع خان کی بیوہ ہیں، میں نے جب سے پاکستان چھوڑ کر بھارت کی شہریت اختیار کی ہے

تب سے میری والدہ کے ساتھ پاکستان میں یہ امتیازی سلوک ہورہا ہے۔انہوں نے اپنی پوسٹ پر لکھا کہ میں پاکستان ایئر فورس کو اپنے خاندان کی بے عزتی پر کھلا خط لکھ رہا ہوں، خط میں انہوں نے پاکستان ایئر فورس کواس حوالے سے شدید تنقید کا نشانہ بنایا اور کہا کہ میں بھارتی شہری ہونے پر فخر کرتا ہوں کہ یہ لوگ اپنے ہیروز کی عزت کرتے ہیں۔یاد رہے کہ عدنان سمیع کے والد ارشد سمیع خان پاکستان کے سابق سفیر، سول سرونٹ اور ایئر فورس پائلٹ تھے، اپنے کیریئر کے عروج کے وقت وہ وفاقی سیکرٹری کے عہدے تک پہنچے تھے۔ انہوں نے 1965 کی جنگ میں کلیدی کردار بھی ادا کیا تھا، وہ جنگ کے دوران پٹھان کوٹ ایئر بیس پر فضائی حملہ کرنے والے پاکستانی جانباز پائلٹس میں سے ایک تھے، ان کی خدمات کے اعتراف میں فیلڈ مارشل ایوب خان نے ستارہ جرات سے بھی نوازا ۔