اسلام آباد (این این آئی)وفاقی وزیر عمر ایوب نے سندھ میں متاثرہ علاقوں میں بجلی کی بحالی کیلئے ہدایات جاری کر دیں ۔وفاقی وزیر پاور و پٹرولیم عمر ایوب خان نے سندھ میں طوفانی بارشوں کی وجہ سے ایمرجنسی کے نفاذ پر اپنے بیان میں کہاکہ سندھ کے علاقوں بالخصوص حیدرآباد، ٹنڈو محمد خان، ٹھٹھہ، بدین، سجاول اور ٹنڈو اللہ یار میں حالیہ بارشوں کی وجہ سے ایمرجنسی نفاذ پر میں نے
حیسکو اور سیپکو کو ریڈ الرٹ رہنے اور صارفین کی متاثرہ علاقوں میں بجلی بحالی میں پھر پور مدد کرنے کی ہدایات جاری کردیں ہیں۔ انہوںنے کہاکہ ان بجلی تقسیم کار کمپنیوں کو تمام ضروری سٹاف کی چھٹیاں کینسل کرنے اور ڈیوٹیاں لگانے کی بھی ہدایات کر دیں ہیں ،فوری طور پر ایمرجنسی کنٹرول روم بھی ان بجلی تقسیم کار کمپنیوں میں قائم کئے جا رہے ہیں ،وفاقی وزیر کو تمام حالات سے مسلسل آگاہ رکھا جا رہا ہے۔
