پشاور (این این آئی)پولیس نے پشاور بس ریپڈ ٹرانزٹ (بی آرٹی) اسٹیشن میں توڑ پھوڑ اور سیکیورٹی گارڈز پر تشدد کا مقدمہ درج کرلیا۔گزشتہ روز پشاور بی آر ٹی اسٹیشن میں سیکیورٹی گارڈ پر تشدد کی ویڈیو سامنے آئی تھی جس میں چند افراد نے سیکیورٹی گارڈز کو زدوکوب کیا اور کپڑے پھاڑے۔پولیس نے اسٹیشن میں تصادم میں ملوث 2 افراد کو گرفتار کرکے مقدمہ درج کرلیا۔دوسری جانب

سینئر سپرٹنڈنٹ آف پولیس (ایس ایس پی) آپریشنز منصورامان نے مختلف بی آرٹی اسٹیشنز کا دورہ کیا اور سیکیورٹی کا جائزہ لیا۔انہوں نے بتایا کہ بی آر ٹی کے تمام اسٹیشنز پر پولیس اہلکار تعینات کردیے گئے ہیں اور ہراسٹیشن پر 4 اہلکار تعینات ہوں گے اور 2 شفٹوں میں 240 پولیس اہلکار ڈیوٹی دیں گے۔انہوں نے کہاکہ ناخوشگوار صورتحال سے نمٹنے کے لیے پیٹرولنگ پولیس بھی ہوگی جب کہ بی آرٹی کنٹرول روم میں پولیس فوکل پرسن بھی تعینات کردیا گیا ہے۔خیال رہے کہ پشاور بس منصوبے کا افتتاح 13 اگست کو وزیراعظم عمران خان نے کیا تھا۔واضح رہے کہ پشاور میں بس ریپڈ ٹرانزٹ (بی آر ٹی) کے اسٹیشنوں پر مسافروں کی توڑ پھوڑ کی ویڈیوز وائرل ہو گئیں۔ویڈیو میں ایک مسافر کو بی آر ٹی بس کی چھت پر چڑھتے اورایک جگہ شہریوں کو جنگلا پھلانگ کر مین کوریڈور میں آتے دیکھا گیا۔ نجی ٹی وی کے مطابق سوشل میڈیا پر وائرل ایک اور ویڈیو میں مسافروں کو بی آر ٹی کے سفری کارڈز کے بغیر اندر داخل ہوتے بھی دیکھا گیا، سوشل میڈیا پر بی آر ٹی بسوں کی پھٹی ہوئی سیٹوں کی تصاویر بھی وائرل ہو رہی ہیں۔یاد رہے کہ دو روز قبل وزیراعظم عمران خان نے بی آر ٹی پشاور کا افتتاح کیا تھا جب کہ گزشتہ روز بی آر ٹی پشاور کی سیکیورٹی پر مامور گارڈ کی پٹائی کی تصاویر بھی منظر عام پر آئی تھیں جس کے بعد بی آر ٹی کے اسٹیشنوں پر سیکیورٹی بڑھا دی گئی ہے۔