اسلام آباد(مانیٹرنگ ڈیسک) بیوی سے جھگڑا کرنے پر بدبخت بیٹے نے ماں کوقتل کردیا، نجی ٹی وی کے مطابق کراچی کے علاقے ڈالمیاروڈنیول کالونی میں قتل کی سفاکانہ واردات ہوئی جہاں ایک سرکاری آفیسر ارشد حسین کی اہلیہ کا اپنی 70 سالہ ساس فاطمہ بی بی سےصبح ساڑھے چھ بجے ناشتہ بنانے پر جھگڑا ہوا۔
جھگڑے کے دوران ارشد حسین نے طیش میں آکر اپنی ماں فاطمہ بی بی پر کلہاڑی کے پے در پے وار کرکے اسے شدید زخمی کردیا۔ ماں نے چیخ وپکار کی تو اہل علاقہ اکٹھے ہوگئے جنہوں نے زخمی بزرگ خاتون کو ہسپتال پہنچانے کیلئے ایمبولینس کا انتظام کیا۔زخمی خاتون کو ہسپتال منتقل کیا جارہا تھا کہ زخموں کی تاب نہ لاتے ہوئے اس نے راستے ہی میں دم توڑ دیا۔ایس ایس پی ایسٹ ساجدسدوزئی نے کہا ہے کہ پولیس نے قتل میں ملوث بیٹے ارشاد حسین کو گرفتار کرلیا، ملزم نے اپنی ماں پر کلہاڑی کے وار کیے ، زخمی بزرگ خاتون کوفوری ہسپتال منتقل کیاجہاں وہ دم توڑگئی۔ساجد سدوزئی کا کہنا تھا کہ ملزم ارشاد حسین سرکاری ادارے میں چیف پیٹی آفیسر ہے اور 20 جون سے ایک سال کی چھٹیوں پر تھا۔ملزم متضاد بیان دے رہا ہے، ریمانڈ لینے کے بعد صحیح صورت حال واضح ہوگی۔