لاہور(این این آئی) وزیراعظم عمران خان نے ارکان قومی اسمبلی کی شکایات پر وزیراعلی پنجاب سردار عثمان بزدار کو اگلے ہفتے فیصل آباد جانے کا حکم دیتے ہوئے ترقیاتی و انتظامی معاملات فوری حل کرنے کی ہدایت کردی۔دورہ لاہور کے دوران وزیراعظم عمران خان سے فیصل آباد سے تعلق رکھنے والے اراکین قومی اسمبلی نے ملاقات کی جس میں ممبران نے وزیراعظم عمران خان سے شکایات کی بھرمار کر دی۔ممبران قومی اسمبلی کی شکایات پر وزیراعظم نے سخت اظہار برہمی کرتے ہوئے
وزیراعلی پنجاب سردار عثمان بزدار کو اگلے ہفتے فیصل آباد جانے کا حکم دیتے ہوئے کہا کہ جو بھی ترقیاتی و انتظامی معاملات ہیں انہیں فوری حل کیا جائے۔وزیراعظم نے کہا کہ مجھے پتہ ہے پولیس اور پٹوار کلچر میں کرپشن ہو رہی ہے، بیوروکریسی اور پولیس کا اجلاس بلایاہے انہیں کہتا ہوں۔بیورو کریسی حکومت کا ساتھ نہیں دیتی، ہر جگہ مسائل ہی مسائل ہیں، نوٹس لیا جائے۔نجی ٹی وی کے مطابق ممبران نے صوبے میں آٹے اور چینی کی مہنگے داموں فروخت پر بھی تحفظات کا اظہار کیا۔
