لاہور (نیوزڈیسک)پاکستان میں جمہوریت کیسے ناچتی ہے ،شیخ رشید نے بتادیا۔ عوامی مسلم لیگ کے سربراہ شیخ رشید کا کہنا ہے سیاسی جماعتوں پر پابندی لگانے کیخلاف ہوں اور نہ ہی جوڈیشل کمیشن سے مطمئن ہوں۔ فوج ملک کی چوکیدار ہوتی ہے قبضہ نہیں کرنا چاہیے۔ ان کا کہنا تھا کہ ایم کیو ایم پر سنگین الزامات لگے ہیں اسے اپنی صفائی میں باہر نکلنا چائیے۔ افطار ڈنر سے خطاب کرتے ہوئے شیخ رشید کا کہنا تھا کہ ہمارے ملک میں جمہوریت پیسوں کی پازیب پہنے ناچتی ہے۔ قوم کی بدقسمتی ہے ایسا حکمران نصیب ہوا ہے ایک ہزار لوگوں کے کراچی میں ہلاک ہونے پر نواز شریف وہاں نہیں پہنچے۔ انھوں نے کہا کہ وزیراعظم ہونے کی حیثیت سے وہ گھر سے نکلے اور خود کراچی جا کر بیٹھے۔ شیخ رشید کا کہنا تھا کہ کراچی پیپلز پارٹی کا گڑھ سمجھا جاتا ہے مگر آصف زرداری کی ہمت نہیں ہوئی خود پہنچے بلکہ بیٹے کو وہاں بھیج دیا۔ ان کا کہنا تھا کہ آصف زرداری جہاں بھی بھاگیں ان کا گھیرا تنگ ہو رہا ہے۔ شیخ رشید کا کہنا تھا کہ پاکستان میں دو نمبر کی اپوزیشن اسمبلیوں میں بیٹھی ہے۔ شیخ رشید نے کہا کہ فوج کرپٹ لوگوں کا احتساب کرے اور جو لوگ فوج میں بھی کرپشن میں ملوث ہیں ان کو بھی آڑے ہاتھوں لے۔ بجلی بحران پر شیخ رشید نے خواجہ آصف اور عابد شیر علی کو نااہل وزیر قرار دیا۔ ان کا کہنا تھا کہ ساری قوم ان دونوں وزیروں کے استعفی کا مطالبہ کر رہی ہے۔ ان کا کہنا تھا کہ وہ عمران خان کے اتحادی ہیں مگر صرف وہ ہی ہیں جو سب پر نظر رکھے ہوئے ہیں۔