اسلام آباد (مانیٹرنگ ڈیسک)قائمہ کمیٹی خزانہ نے اراکین پارلیمنٹ کیلئے تنخواہ اور الائونس ترمیمی بل متفقہ طور پر منظور کرلیا، رکن پارلیمنٹ کو سال میں 25 ٹریول وائوچر مل سکیں گے ، رکن پارلیمنٹ کی بیوی اور 18 سال سے کم عمر کے بچے سہولت سے مستفید ہونگے،

کمیٹی نے قانونی پہلوئوں کا جائزہ لینے کیلئے کسٹم ایکٹ میں ترمیم کی تجویز موخر کر دی،روزنامہ جنگ کے مطابق فاروق ایچ نائیک کی زیر صدارت کمیٹی کا اجلاس ہوا، ترمیمی بل کے تحت ارکان پارلیمنٹ ٹریول وائوچر کی سہولت کسی بھی وقت استعمال کرسکیں گے ، پہلے ارکان پارلیمنٹ کو سالانہ 25 ائیر ٹکٹ کی اجازت تھی، سفر نہ کرنے کی صورت میں ائیر ٹکٹ کی سہولت ختم ہو جاتی تھی، چیئرمین کمیٹی فاروق ایچ نائیک کا کہناتھا کہ ایوان بالا کے تمام اراکین امیر نہیں ہیں، ٹریول وائوچرز کی سہولت سے قومی خزانے پر اضافی بوجھ نہیں پڑیگا، بزنس کلاس ائیر ٹکٹ کو ٹریول وائوچر میں تبدیل کیا گیا ہے، کمیٹی میں ممبر آپریشنز کسٹمز جاوید غنی نے کسٹم ایکٹ 1969 میں ترامیم پر بریفنگ میں بتایا تجویز ہے کہ درآمدی اشیا کا ایچ ایس کوڈ تبدیل کرنے کا اختیار ایف بی آر بورڈ کے پاس ہو، اس تجویز سے درآمدی اشیا کیلئے ٹیکس چھوٹ یا ٹیکس سلیب تبدیل ہو سکیں گے، کمیٹی نے گوادر میں تعمیراتی کام کیلئے دو کمپنیوں کو درآمدی مشینری پر ڈیوٹی کی چھوٹ اعتراض کرتے ہوئے وزارت بحری امور کو بھی طلب کرلی۔