اسلام آباد ( آن لائن)پاکستان نے ایک اور عالمی اعزاز اپنے نام کرلیا ہے ،پاکستانی نوجوان نے ایک پائوں پر 40 پائونڈ وزن کے ساتھ 60 پش اپس لگا کر امریکہ کا ریکارڈ توڑ دیا ہے۔ گنیز بک آف ورلڈ ریکارڈ نے باقاعدہ ای میل کے ذریعہ ریکارڈ کی تصدیق کرلی ہے۔ عرفان محسود کا مجموعی طور پر یہ 31واں عالمی ریکارڈ ہے۔

خیبر پختونخوا کے علاقے جنوبی وزیرستان کے نوجوان عرفان محسود نے امریکی کھلاڑی کا ریکارڈ توڑ دیا۔جنوبی وزیرستان کے کھلاڑی عرفان محسود نے صرف ایک منٹ میں ایک پاؤں پر 40 پاؤنڈ وزن کے ساتھ 60 پش آپس لگا کر امریکی کھلاڑی رون کوپر کا ریکارڈ توڑا۔اس سے پہلے امریکہ کے رون کوپر نے ایک منٹ میں 40 پاؤنڈ وزن کے ساتھ 53 پش آپس لگائے تھے۔عرفان محسود نے کہا ہے کہ ملک کے لیے 50 عالمی ریکارڈ بنانا اْن کا مشن ہے۔ ملک کے لیے ریکارڈ بنانے سے انہیں دلی خوشی ہوتی ہے۔جنوبی وزیرستان کے کھلاڑیوں میں ٹیلنٹ ہے تاہم انہیں حکومتی سرپرستی کی ضرورت ہے۔یاد رہے کہ اس سے قبل عرفان محسودنے بھارتی کھلاڑی ایشوانی کمار سنگھ کا ریکارڈ توڑا تھا۔ عرفان محسود نے ایک منٹ میں 60 کلو وزن کے ساتھ ایک پاؤں پر 48 پش آپس لگا کر عالمی ریکارڈ بنایا،اس پہلے بھارت کے کھلاڑی ایشوانی کمار سنگھ نے ایک منٹ میں 34 پش آپس لگائے تھے۔ اس کے علاوہ جنوبی وزیرستان کے رہائشی مارشل آرٹ کے کھلاڑی عرفان محسود نے فنگر پْش اپس لگا کر 23 واں عالمی ریکارڈ بنایا تھا۔ عرفان محسود نے ایک منٹ میں 60 کلو وزن کے ساتھ 34 بار فنگر پش اپس لگا کر یہ ریکارڈ بنایا۔