اسلام آباد(نیوزڈیسک )ایک سعودی شہزادے نے یہ دلچسپ دعوی کرکے سب کو حیران کردیا ہے کہ اسے اس کے اپنے شاہی خاندان کے افراد نے ہی نشہ آور اشیاکھلا کر اغواکرلیا اور کچھ عرصہ زبردستی ہسپتال میں رکھنے کے بعد قید کردیا۔
اخبار دی گارڈین کے مطابق اس شہزادے نے پہلی دفعہ نیوز ایجنسی ایسوسی ایٹڈ پریس کے ساتھ ٹیلی فون کے ذریعے رابطہ کیا ہے۔ مبینہ اغواکا نشانہ بننے والے شہزادے سلطان بن ترکی کے بارے میں بتایا گیا ہے کہ انہوں نے گزشتہ مئی میں سوئٹزرلینڈ میں قیام کے دوران رائل سعودی پولیٹیکل آرگنائزیشن کی بنیاد رکھی اور وہ کرپشن کے خلاف آواز اٹھانے کیلئے بھی شہرت رکھتے ہیں۔ شہزادے کا کہنا ہے کہ حکومتی کرپشن کے خلاف ان کی آواز کو خطرہ محسوس کیا گیا اور بالآخر ان کے اپنے ہی عزیزوں نے انہیں سوئٹزرلینڈ میں نشہ آور اشیاکے ذریعے بے ہوش کیا اور زبردستی سعودی عرب لے گئے۔ اخبار کے مطابق شہزادے نے نیوز ایجنسی کو بتایا کہ انہیں دو ماہ کیلئے ایک ہسپتال میں محصور رکھا گیا اور پھر ہاس اریسٹ کردیا گیا۔
حال ہی میں ویب سائٹ Movement for Islamic Reform in Arabia نے دعوی کیا تھا کہ کران پرنس عبداللہ کے دورہ سوئٹزرلینڈ کے دوران ایک خصوصی آپریشن کے ذریعے شہزادہ سلطان بن ترکی کو ایک خصوصی بوئنگ 747 جہاز میں اغواکیا گیا۔ واضح رہے کہ سعودی حکام کی طرف سے ان الزامات پر تاحال کوئی تبصرہ سامنے نہیں آیا۔