کراچی(نیوزڈیسک) میڈیا پر تنقید اور پارٹی کی جانب سے مایوسی کے اظہار نے بلاول بھٹو کو وطن واپسی پر مجبور کر دیا‘پیپلز پارٹی کے چیئرمین بلاول بھٹو زرداری والد آصف زرداری کو دبئی پہنچانے کے بعد رحمن ملک کے ہمراہ وطن واپس پہنچ گئے ۔ تفصیلات کے مطابق میڈیا پر تنقید اور پارٹی کی جانب سے مایوسی کے اظہار کے بعد بلاول بھٹو زرداری رحمان ملک کے ہمراہ کراچی پہنچ گئے ہیں جبکہ آصف زرداری اور ان کی بہن فریال تالپور کا کوئی پتا نہیں کب لوٹیں گے۔دو روز قبل آصف علی زرداری اور بلاول دبئی گئے تھے۔ اس سے قبل اعلان کیا گیا تھا کہ صرف بلاول دبئی جارہے ہیں تاہم رات گئے اچانک ان کے ساتھ جانے والی شخصیت آصف علی زرداری تھے جو آج کل پیپلزپارٹی کے رہنماﺅں کی کرپشن کے باعث فورسز کی ہٹ لسٹ پر نظر آرہے تھے۔ ان سے دو روز قبل آصف زرداری کی ہمشیرہ فریال تالپور بھی اچانک دبئی نکل گئی تھیں۔ واضح رہے کہ آج کل آصف زرداری، فریال تالپور اور پیپلز پارٹی کے دیگر رہنماﺅں کےخلاف کراچی سمیت سندھ بھر میں ہونے والی کرپشن پر گھیرا تنگ کیا جارہا ہے اور بعض حلقوں کا کہنا ہے کہ پاک فوج کے خلاف آصف زردری کی تنقید کی بڑی وجہ بھی کرپشن کو بے نقاب کرنا تھی۔