اسلام آباد (این این آئی) پاکستان مسلم لیگ (ن) کی ترجمان مریم اورنگزیب نے وفاقی وزیر اطلاعات اور معاون احتساب کی پریس کانفرنس پر ردعمل کا اظہار کرتے ہوئے کہا ہے کہ طاقتوراے ٹی ایمز کو جہاز میں بٹھا کر، بھگا کر خود احتسابی کا درس دیا جارہا ہے،کمیشن رپورٹ نے عمران صاحب اور بزدار صاحب کو گرفتار کرنے کی تاریخ نہیں بتائی۔

اتوار کو جاری اپنے بیان میں انہوں نے کہاکہ اے ٹی ایمز کو بھگا کر عمران صاحب نے انکوائری نیب نیازی گٹھ جوڑ کے حوالے واہ،عمران صاحب طاقتوروں کی تجوریاں بھرکے احتساب کا ڈرامہ نہ کریں،چینی بحران میں صرف عمران صاحب ملوث ہیں،عوام کا چینی چوری کر کے زمان پارک کا گھر بنا۔ انہوں نے کہاکہ تاریخی چینی چور عمران مافیا شورمچا کر بچ نہیں سکتا،چینی چوروں کو ملک سے بھگا کر چینی چور پریس کانفرنس کر رہے ہیں۔ انہوں نے کہاکہ تاریخی چینی چوری کے بعد جھوٹ بول کر اب احتساب کا نعرہ نہیں لگایا جا سکتا،عمران صاحب نے چینی چوری کے فیصلوں کی منظوری دے کر عوام کی جیب پر ڈاکہ ڈالا۔ انہوں نے کہاکہ چینی چور عمران اور بزدار صاحب کو عوام کے سامنے پیش کیاجائے،چینی چوری کمشن میں مرکزی ملزم عمران خان کیوں پیش نہیں ہوئے؟ عوام کو جواب چاہئے۔ انہوں نے کہاکہ عمران صاحب کی چینی چوری کی وجہ سے عوام آج تک 90 روپے کلو چینی خریدنے پر مجبور ہیں،عمران صاحب قلت کے باوجود چینی برآمد کیوں کی؟ ذخیرہ اندوزوں کے خلاف کارروائی کیوں نہ کی؟۔ انہوں نے کہاکہ عمران صاحب چینی کی قیمت 52 روپے سے 90 روپے کیوں ہوئی؟،ڈالر کی قیمت میں اضافے کے باوجود چینی پر سبسڈی کیوں دی؟ عمران صاحب جواب دیں،نیب نیازی گٹھ جوڑ عمران مافیا کی چینی چوری کی تحقیقات کرے گا، اس سے بڑا قوم سے مذاق نہیں ہوسکتا۔ انہوں نے کہاکہ ملک کا مستقبل، معیشت، روزگار داؤ پر لگانے والے خود احتسابی کا نعرہ لگا رہے ہیں،کمیشن بنانے کا مقصد عمران اور بزدار صاحب کو بچانا تھا۔ انہوں نے کہاکہ چینی کمیشن کی رپورٹ مسلم لیگ (ن) کے بنائے ہوئے انکوائری کمشن ایکٹ کی وجہ سے عوام کے سامنے آئی۔