لاہور(این این آئی)وزیر اطلاعات پنجاب فیاض الحسن چوہان نے اپوزیشن لیڈر شہباز شریف کے کرونا کے باعث قومی اسمبلی اجلاس میں نہ جانے کے معاملے پر اپنے ردعمل میں کہا ہے کہ شہباز شریف کرونا سے لڑنے کا عزم اور نعرہ لگا کر لندن سے پاکستان آئے تھے اور اب عالم یہ ہے کہ جس دن سے پاکستان آئے ہیں ایک کمرے میں قید ہیں۔ فیاض الحسن چوہان نے کہا کہ

شہباز شریف سے زیادہ بزدل شخص آج تک نہیں دیکھا۔ انہوں نے کہا کہ شہباز شریف اپنے اندر جرات پیدا کریں اور کرونا کے خلاف جنگ کے عملی میدان میں قدم رکھیں۔ فیاض الحسن چوہان نے مزید کہا کہ اگر شہباز شریف نے واپس آ کر ایک کمرے میں ہی دبک کر بیٹھنا تھا تو ان کی لندن سے واپسی کا کوئی فائدہ نہیں۔ انہوں نے کہا کسی بزدل کو حکمرانی یا کسی سیاسی جماعت کی قیاد ت کا کوئی حق نہیں۔ شہباز شریف نے کرونا وائرس کے خلاف جنگ میں اپنے کردار سے ثابت کر دیا ھے کہ وہ خادم اعلیٰ نہیں بلکہ بزدل اعلیٰ ھیں۔