کراچی (این این آئی)مرکزی ترجمان وسیکریٹری اطلاعات پاکستان پیپلز پارٹی سینیٹر مولابخش چانڈیو نے کہا ہے کہ چیئرمین بلاول بھٹو زرداری نے آج پھر ثابت کر دیا کہ وہ وفاق کی علامت ہیں ۔قومی اسمبلی میں کورونا جیسے معاملے پر وزیر خارجہ نے بہت ہی سطحی سوچ کا مظاہرہ کیا۔ بلاول بھٹو زرداری کی مدبرانہ تقریر پر حکومتی جواب غیرسنجیدگی کی انتہا ہے۔ مولابخش چانڈیو نے کہا کہ حیرت ہے کہ وزیر خارجہ کو کورونا کے خلاف جنگ میں حکومت سندھ کا

قائدانہ کردار سندھ کارڈ لگ رہا ہے۔چیئرمن بلاول نے تمام صوبائی حکومتوں کے اقدامات کی تعریف کی ۔ حکومت کا آج بھی نشانہ کورونا نہیں حکومت سندھ رہی ۔بلاول بھٹو زرداری کورونا کے خلاف ملکر لڑنے کی پیشکش کر رہے ہیں ۔ انہوں نے کہا کہ حکومت مخلصانہ پیشکش ٹھکرا کر سندھ سے لڑنے لگ جاتی ہے ۔وقت ہے کہ وفاقی حکومت ہوش کے ناخن لے اور بلا وجہ کی تنازعات سے گریز کرے۔ یہ وقت کورونا سے عوام کہ زندگیاں محفوظ کرنے کیلئے مشترکہ کاوشوں کا ہے۔