اسلام آباد (مانیٹرنگ ڈیسک )وفاقی وزیر ریلوے شیخ رشید کا دعویٰ ہے کہ مسلم لیگ نواز اور پاکستان تحریک انصاف 18ويں ترميم پر بات چل رہی ہے، ن ليگ نے مشروط حمایت کی پیشکش کردی۔ وفاقی وزیر کا کہنا ہے کہ نواز شریف کی نااہلیت اور شريف خاندان پر مقدمات ختم کرنے کی شرط رکھی گئی ہے، حمایت کے بدلے ن لیگ نے نیب قانون میں تبدیلی بھی مانگی ہے، جہانگیر ترین علی بابا چالیس چور گینگ کا حصہ تھے،

یہ گروپ اپنی جگہ ہے لیکن ملبہ صرف جہانگیر ترین پر گرا۔نجی ٹی وی سما ء کے پروگرام میں وفاقی وزیر ریلوے کا کہنا ہے کہ مسلم لیگ نواز اور پاکستان تحریک انصاف کے رہنماء اسد عمر سے 18ویں ترمیم پر بات چیت چل رہی ہے، ن لیگ نے ترمیم کے خاتمے کیلئے مشروط حمایت کی پیشکش کی ہے، ن ليگ نے نواز شریف کی نااہلی اور شريف خاندان پر مقدمات ختم کرنے کی شرائط رکھی ہیں۔شیخ رشید کا دعویٰ ہے ہے کہ ن لیگ نے 18 ویں ترمیم کے خاتمے کی حمایت کے بدلے نیب قانون میں تبدیلی بھی مانگی ہے۔آئین کی اٹھارویں ترمیم کے تحت صحت سمیت کئی وزارتیں صوبوں کے حوالے کردی گئی تھیں، کرونا وائرس سے پیدا شدہ صورتحال میں وفاق اور سندھ حکومت کے درمیان اختیارات کے معاملے پر شدید اختلافات سامنے آئے ہیں، دونوں جانب سے رہنماؤں کے تند و تیز بیانات صورتحال کو مزید خراب کررہے ہیں۔وفاقی وزیر ریلوے نے مزید کہا کہ جہانگیر ترین علی بابا 40 چور گینگ کا حصہ تھے، گينگ اب بھی اپنی جگہ ہے لیکن ملبہ صرف جہانگیر ترين پر گرا، فردوس عاشق اعوان تھوڑا صبر کريں تو ایڈجسٹ ہوجائيں گی۔شیخ رشید کا کہنا ہے کہ وزیراعظم کا بیان سمجھ نہیں آیا جس میں انہوں نے کہا تھا کہ اشرافیہ نے لاک ڈاؤن کرایا، عمران خان سے مل کر پوچھوں گا کہ کس کو اشرافیہ کہہ رہے تھے۔