کراچی (این این آئی)انڈس ہسپتال کے چیئرمین ڈاکٹر عبدالباری نے ملک میں جاری لاک ڈاؤن میں نرمی پر تشویش کا اظہار کرتے ہوئے کہا ہے کہ کورونا وائرس سے بچاؤ کے لیے احتیاط نہ کی تو خدانخواستہ صورتحال اٹلی جیسی ہو سکتی ہے۔ایک انٹرویومیں ڈاکٹر عبدالباری خان نے کہا کہ جہاں مجمع ہو گا وہاں کورونا کے پھیلنے کا خدشہ ہو گا۔
چاہے مجمع مارکیٹ میں ہو یا مسجد میں اسے روکنے کی ضرورت ہے لہذا سب سے التجا ہے کہ غیر ضروری گھر سے باہر نہ نکلیں۔ڈاکٹر عبدالباری نے کہا کہ پاکستان کو وینٹی لیٹرز کی کمی کا سامنا ہے، کورونا کے کیسز تیزی سے بڑھے تو اسپتالوں کے لیے سنبھالنا مشکل ہو جائے گا اور اگر احتیاط نہ کی تو خدانخواستہ صورتحال اٹلی جیسی ہو سکتی ہے۔انھوں نے ہدایت کی کہ صفائی کا خیال رکھیں اور ماسک کا استعمال لازمی کیا جائے۔دوسری جانب ڈاکٹر سعد نیاز کا کہنا تھا کہ ٹیسٹ بڑھائے جائیں گے تو کورونا کیسز بھی زیادہ آئیں گے اور ہمارے ہیلتھ سسٹم میں اتنی صلاحیت نہیں کہ بڑی تعداد میں کیسز دیکھ سکیں کیونکہ ہمارا صحت کا نظام زیادہ کیسز کا متحمل نہیں ہوسکتا۔ڈاکٹر سعد نیاز نے کہا کہ سب کہہ رہے ہیں مئی میں کورونا وائرس بڑھیں گے اس لیے سخت احتیاط کی ضرورت ہے اس صورتحال میں لاک ڈاؤن کو مزید دو سے چار ہفتے بڑھانا ہوگا۔
