اسلام آباد(مانیٹرنگ ڈیسک) کرتار پور گوردوارے کے گنبدوں کی مرمت کا کام مکمل،نجی ٹی وی کے مطابق علاقے میں چلنے والی تیزہواؤں کے باعث کرتارپور گوردوارے کے گرنے والے 8گنبدوں کی مرمت کا کام چند ہی گھنٹوں میں مکمل کرلیا گیا ۔
بھارت نے گزشتہ روزشدید طوفان کے باعث گوردوارہ کرتارپور صاحب کے چند گنبدوں کو پہنچنے والے نقصان پرپاکستان سے اس ضمن میں اپنی تشویش کا اظہار کرتے ہوئے فوری طورپران گنبدوں کی تسلی بخش مر مت کرانے کیلئے درخواست کی تھی ۔ تاہم بھارت کی جانب سے اس بارے تشویش ظاہر کرنے سے قبل ہی نقصان پہنچنے والے گنبدوں کی ہنگامی طورپرمرمت کرکے ان کو پہلے والی شکل میں بحال کردیا گیا تھا۔ وزارت خارجہ کی ترجمان عائشہ فاروقی کا کہنا ہے کہ شدید طوفان کے باعث گردوارہ کرتارپورصاحب کے چند گنبدوں کو پہنچنے والے نقصان کی مرمت 24 گھنٹے کے دوران ہی کرلی گئی تھی۔ پاکستان سکھ گوردوارہ پربندھک کمیٹی اورسکھ برادری نے نقصان پہنچنے والے گنبدوں کی فوری مرمت کیے جانے والی کوششوں کو بے حد سراہا، تاہم ترجمان وزارت خارجہ کا کہنا تھاکہ یہ کتنی ستم ظریفی کی بات ہے کہ ایک ایسا ملک جہاں مذہبی اقلیتوں کواپنا تحفظ حاصل نہیں اورجہاں ریاستی مشینری کی سرپرستی میں ان کی عبادتگاہیں ختم کردی گئی ہیں ،مذہبی مقام پرہونے والے معمولی نقصان کو بڑھاچڑھا کر پیش کیا جاتا ہے۔
