اسلام آباد(مانیٹرنگ ڈیسک) کورونا وائرس کی وجہ سے ملک بھر کی بند کاروباری سرگرمیاں دوبارہ شروع کرنے کیلئے آئندہ ہفتے سے مزید 12 سیکٹر ز کھولنے پر غور۔اس سلسلے میں وفاق نے صوبوں سے تجاویز طلب کر لی ہیں،ان میں زیادہ تر سروسز سیکٹرز شامل ہیں۔
روزنامہ 92کے مطابق وفاقی حکومت نے یہ تجویز صوبوں کو بھیج دی ہے ،صوبوں کے جواب پر حتمی فیصلہ کیا جائیگا، اس بات کی امیدہے کہ 14 اپریل سے مزید سیکٹر ز کھول دیئے جا ئینگے ۔ ذرائع کے مطابق نئے کھولے جانے کیلئے مجوزہ سیکٹرز میں بک شاپس،الیکٹریشن ،باربر شاپس، سیمنٹ، سریا، ٹائلیں، سینیٹری، بجلی اوردیگر شامل ہیں تاہم ٹیکسٹائل اور سپورٹس سیکٹر سب سے آخر میں کھولے جا ئینگے ۔وزیرِاعظم نے تعمیراتی صنعت کیلئے پیکیج کا اعلان کیا ہے اوراس پر عملدرآمد کیلئے سیمنٹ، سریا، ٹائلیں، سینیٹری، بجلی اور دیگر دکانوں کو کھولنا ہوگا، بصورت دیگر تعمیراتی صنعت کا پیکیج کامیاب نہیں ہوسکے گا۔دکانداروں کو اس وقت سب سے بڑا مسئلہ دکانوں کا کرایہ اور یوٹیلیٹز کی ادائیگیوں سے متعلق ہے ۔اس وقت لاک ڈاؤن سے درآمدات و برآمدات بندہیں اور کراچی کی بندرگاہوں پر ڈیڑھ لاکھ سے زائد کنٹینرز جمع ہوگئے ہیں،یہی صورتحال رہی تو کورونا کیلئے بھی سامان اتارنے کی گنجائش نہیں بچے گی۔
