سرگودھا(این این آئی) سرگودھا شہر میں فیکٹری ایریا میں پیپلز کالونی میں65سالہ پازیٹو مریض اور اس کے بیٹے اور بیوی کے شکار ہونے پر احتیاطی تدابیر کے طور پر ضلعی انتظامیہ نے پوری آبادی کو قرنطینہ قرار دیدیا۔ذرائع کے مطابق فیکٹری ایریا کی پیپلز کالونی میں 65 سالہ رشید کے بعد
اس کے بیٹے شہباز اور بہو نگینہ بی بی میں وائرس کی تحقیق پر حفاظتی تدابیر پر کمشنر اور ڈپٹی کمشنر کے حکم پر علاقہ پیپلز کالونی کو قرنطینہ قرار دیتے ہوئے انتظامیہ کے ہمراہ طبی سہولیات کے قائم کیمپ کے ساتھ ڈسپنسری کا اعلان کیا لیکن تیسرے روز نصف رات کو قرنطینہ میں ایک خاتون کی طبیعت خراب ہونے پر محکمہ صحت کی کارکردگی کا پول کھل گیا۔انتظامیہ کی طرف سے سیل مکینوں نے بتایا کہ رات اچانک خاتون کی طبیعت خراب ہونے پر کوئی سہولت نہیں دی گئی اورانتظامیہ اور محکمہ صحت کے فراہمی سہولیات کے لئے قائم امدادی کیمپ میں کوئی سازوسامان میسر نہیں ۔ضلعی انتظامیہ کا کہنا ہے کہ پیپلز کالونی میں جراثیم کش سپرے کر کے 95 گھروں میں مقیم گیارہ سو افراد پر مشتمل علاقہ کو قرنطینہ قرار دے کر چاروں گیٹ مکمل سیل کر کے ایک گیٹ کے ذریعے تمام سہولیات میسر کر رکھی ہیں۔اس قرنطینہ کے لوگوں نے بتایا کہ انتظامیہ اور محکمہ صحت کی طرف سے کوئی سہولیات میسر نہیں اور کسی اہلکار نے خاتون کی طبیعت خراب ہونے کے باوجود سیل حدود میں داخل ہونے کی ہمت نہیں کی ۔
