ریاض (نیوز ڈیسک) سعودی عرب میں کرونا وائرس سے متاثر ہونے والے مزید 64 افراد صحت یاب ہو گئے، سعودی عرب میں اب تک صحت یاب ہونے والے افراد کی تعداد 328 تک پہنچ گئی ہے۔ نئے صحت یاب ہونے والے افراد کو گھر بھیج دیا گیاہے۔

سعودی وزارت صحت کا کہناہے کہ آج 165 کیسز سامنے آئے ہیں، سعودی میں آج پانچ اموات ہوئیں۔ دوسری جانب سعودی حکومت نے کورونا وائرس وبا کی وجہ سے حفاظتی تدابیر کے تحت مقدس شہروں مکہ اور مدینہ میں کرفیو نافذ کر دیا ہے جس کا اطلاق حرم شریف اور مسجد نبوی پر بھی ہوگا۔عرب میڈیا کے مطابق مکہ اور مدینہ میں پورے دن کے لیے کرفیو نافذ کردیا گیا ہے تاہم صبح 6 بجے سے سہ پہر 3 بجے تک شہریوں کو دوائی اور کھانے پینے کی اشیاء لینے کیلئے گھر سے نکلنے کی اجازت ہوگی تاہم یہ رعایت خاندان کے ایک فرد کیلئے ہوگی۔کرفیو کے دوران تمام تجارتی سرگرمیاں اور ذرائع آمد ورفت بند رہیں گے۔ وقفے کے دوران صرف دوائی اور ضروری اشیاء کی خریداری کے لیے نوجوانوں کو اجازت ہوگی۔ بچوں اور بزرگوں کو گھر پر ہی رہنے کی ہدایت کی گئی ہے، محکمہ صحت، میڈیا ورکز اور میونسپل کے خصوصی عملے کو استثنیٰ حاصل ہوگی۔