لاہور( این این آئی )لاہورہائیکورٹ نے رنگ گورا کرنے والی کریموں کیخلاف کارروائی کیلئے جاری نوٹس پر حکم امتناعی کر کے حکومت پنجاب سے جواب طلب کرلیا ۔لاہور ہائیکورٹ کے جسٹس مزمل اختر شبیر نے محمد ذکریا شیخ ایس کی وساطت سے دائر درخواست پر سماعت کی۔درخواست میں چیف ڈرگ کنٹرول کی طرف سے جاری نوٹیفیکیشن کو چیلنج کیا گیا ہے۔ مذکورہ نوٹیفکیشن کے تحت تمام ڈرگ انسپکٹروں کو رنگ گورا کرنے والی
کریموں کیخلاف کارروائی کا حکم دیا گیا ۔درخواست گزار نے موقف اپنایا کہ پنجاب ڈرگ کنٹرول اتھارٹی اس قسم کا حکم نہیں دے سکتی کیوں کہ یہ اختیار صرف وفاقی حکومت کے پاس ہے۔استدعا ہے کہ رنگ گورا کرنے والی کریموں کے خلاف ممکنہ تادیبی کارروائی روکنے کا حکم دیا جائے ۔عدالت نے درخواست پر حکم امتناعی جاری کرتے ہوئے کریموں کے خلاف تادیبی کارروائی کرنے سے منع کرتے ہوئے حکومت پنجاب سے جواب طلب کرلیا ۔
