کراچی(این این آئی)وزیراعلی سندھ سید مراد علی شاہ کی ہدایت پرحکومت سندھ نے 3 ارب روپے سے کورونا وائرس کا فنڈ قائم کرنے کا فیصلہ کیا ہے وزیراعلی سندھ نے اپنی تنخواہ سمیت پوری صوبائی کابینہ کی ایک ماہ کی تنخواہ کرونا وائرس فنڈز کے لیے دینے کا اعلان کیا ہے۔

وزیراعلی سندھ سید مراد علی شاہ کا کہنا ہے کہ کرونا وائرس فنڈ میں سندھ حکومت کے تمام ملازمین حصہ لیں گے،میں اورمیرے وزرا ، مشیران، اسپیشل اسسٹنٹ اپنی پوری تنخواہ دے رہے ہیں۔ حکومت سندھ کے ترجمان کے مطابق چیف سیکریٹری ، آئی جی پولیس اور چیئر مین پی اینڈ ڈی اپنی پوری تنخواہ فنڈ میں دیں گے اسی طرح گریڈ 21 کے افسران نے آدھی تنخواہ فنڈ میں دینے کا فیصلہ کیا ہے جبکہ گریڈ 17 سے گریڈ 20 تک کی 10 فیصد تنخواہ کاٹی جائے گی اور گریڈ 1 تا گریڈ 16 تک 5 فیصد تنخواہ فنڈ میں دیں گے وزیراعلی سندھ کا کہنا ہے کہ کورونا وائرس فنڈ کی پانچ افراد مانیٹرنگ کریں گے جن میں 2 سرکار ی اور 3 پرائیویٹ سیکٹر سے لیے جائیں گے ان میں چیف سیکریٹری ،سیکریٹری چیئرمین ، سیکریٹری خزانہ ، انڈس اسپتال کے ڈاکٹر عبدالباری ، فیصل ایدھی اور مشتاق چھیپا ممبر ہوں گے،یہ کمیٹی کورونا وائرس کے حوالے سے تمام اخراجات کرنے کے لیے بااختیار ہوگی۔اس فنڈ کا اکانٹ کھولا جارہا ہے۔ میئر کراچی نے بھی اپنی پوری تنخواہ دینے کا اعلان کیا ہے کورونا وائرس فنڈ کے اکانٹ میں مخیر حضرات بھی عطیہ کرسکتے ہیں۔وزیراعلی سندھ نے ریلیف فنڈ سے 1 ارب روپے ٹرانسفرکر کے اس اکائونٹ میں دینے کااعلان کیا ہے فنڈزکے استعمال کے لیے ہر چیک کے لیے 2 دستخط کنندہ ہوں گے ایک سیکریٹری فنانس اور ایک پرائیویٹ سیکٹر سے ہوگا۔