اسلام آباد (این این آئی)اسلام آباد ہائیکورٹ نے پی ٹی ایم رہنما ممبر قومی اسمبلی علی وزیر کی نااہلی درخواست خارج کر دی ۔ منگل کو چیف جسٹس اسلام آباد ہائی کورٹ کی سربراہی میں کیس کی سماعت کے دور ان اسلام آباد ہائی کورٹ کے چیف جسٹس اطہر من اللہ نے درخواست کو ناقابل سماعت قرار دے دی ۔

شہری عبدالولی کی درخواست میں پشون تحفظ موومنٹ پر پابندی کی بھی استدعا کی گئی تھی ۔ چیف جسٹس نے ریمارکس دیئے کہ اگر کسی پر کوئی الزام ہے تو اسکا طریقہ کار موجود ہے۔ چیف جسٹس نے کہاکہ صرف یہ بتائیں پٹیشنر کہاں متاثرہ ہے۔ درخواست گزار کے وکیل نے کہاکہ درخواست گزار اس ملک کا باعزت شہری ہونے کی وجہ متاثرہ ہے۔چیف جسٹس اطہر من اللہ نے کہا کہ یہاں پہلے ہی بہت سے کیسز زیر التوا ہیں،ہر فرد جو ملک میں رہ رہا ہے وہ اس ریاست کے ساتھ مخلص ہے۔ درخواست میں موقف اختیار کیاگیاکہ پی ٹی ایم اور ان کے رہنما علی وزیر ریاست اور اداروں کے خلاف سرگرمیوں میں ملوث ہیں۔درخواست میں استدعا کی گئی کہ علی وزیر کو ریاست مخالف اور غیر آئینی تقریروں پر آرٹیکل 62،63 کے تحت نااہل کیا جائے۔