اسلام آباد( آن لائن)جمعیت علماء اسلام (ف) نے تمام طے شدہ سیاسی جلسے منسوخ کردیئے ۔ترجمان جے یو آئی کے مطابق پارٹی سربراہ مولانا فضل الرحمن نے پارٹی کی سینئر قائدین کو تمام سیاسی جلسے منسوخ کرنے کے احکامات جاری کر دیئے ہیں،نئی تاریخ کا اعلان جلد کیا جائیگا۔

مولانا فضل الرحمان نے کہا کہ کرونا وائرس کے خاتمے کے بعد ملک کو عمرونا وائرس سے بھی پاک کریں گے ،پوری قوم خوف میں مبتلا ہے جبکہ عمرونا مافیا ماسک سمگلنگ میں لگی ہوئی ہے،کورونا وائرس کی وبا بڑھ رہی ہے ، اس سے نمٹنے کیلئے احتیاطی تدابیر اپنانی ہوں گی۔انہوں نے عوام سے اپیل کی ہے کہ وباء کے بچائو اور خاتمے کیلئے اپنا کردار ادا کریں ۔ اس وقت پاکستان سمیت دنیا بھر میںکرونا وائرس کی وباء نے تباہی پھیلائی ہوئی ہے جس سے عوام میں شدید خوف وہراس پایا جارہا ہے اس صورت حال میں سیاسی جلسے اور مارچ مفاد میں نہیں ،انہوں نے کہا کہ وباء سے بچائو اور ان کے خاتمے کیلئے تمام اداروں کے ساتھ تعاون کرنے کیلئے تیار ہیں ملک کو اس وقت متحد کرنے کی ضرورت ہے ، مولانا فضل الرحمن نے تشویش کا اظہار کرتے ہوئے کہا کہ پوری دنیا کروناوائرس کے خاتمے کی جنگ لڑ رہی ہے اور حکومت کو سیاست سے فرصت ہی نہیں مل رہی اور اپوزیشن کو سیاسی نشانہ بنایا جارہا ہے،انہوں نے کہا کہ اس طرف کرونا وائرس سے پوری قوم خوف و ہراس میں مبتلا ہے دوسری طرف عمرونا مافیا کروڑوں روپے کی رشوت لیکرماسک سمگلنگ کررہی ہے اور یہ ایک لمحہ فکریہ ہے کہ ادارے بھی خاموش ہیں،ایف آئی اے کو فوری کارروائی کرتے ہوئے دھندے میں ملوث کرداروں کو کیفر کردار تک پہنچانا چاہیے ۔