اسلام آباد ( آْن لائن ) پی ٹی آئی سینئر رہنماء جہانگیرترین نے یوٹیلیٹی اسٹورز کو 20 ہزارٹن چینی دینے کی آفر واپس لے لی، چیئرمین یوٹیلیٹی اسٹورز کارپوریشن کو خط میں آگاہ کیا کہ یوٹیلیٹی اسٹورز67 روپے فیل کلو کے حساب سے20 ہزار ٹن چینی دینے کی آفر کی ہے، لیکن میڈیا پر منفی پروپیگنڈے کے باعث آفر واپس لینا چاہوں گا۔ یوٹیلیٹی اسٹورز کارپوریشن نے تحریک انصاف کے رہنما جہانگیر ترین
اور دیگر شوگر ملز مالکان سے بغیر ٹینڈر چینی خریدنے کا فیصلہ کر لیا،ایک لاکھ ٹن چینی خریداری کی سمری منظوری کے لئے کابینہ کو ارسال کر دی گئی ۔ چیئرمین یوٹیلیٹی اسٹورز ذوالقرنین خان نے میڈیا سے گفتگو کرتے ہوئے بتایا کہ شوگر ملز مالکان سے ایک لاکھ ٹن چینی خریدنے کیلئے کابینہ سے خصوصی اجازت لی جائیگی، جس کی سمری منظوری کے لئے کابینہ کو بھجوا دی ہے۔چیئرمین یوٹیلیٹی اسٹورز ذوالقرنین خان نے کہا کہ شوگر ملز مالکان یوٹیلیٹی اسٹورز کو کم نرخوں پر چینی دیں گے، وزیراعظم عمران خان کی مداخلت سے شوگر مالکان سستے داموں چینی دینے کو تیار ہوئے ہیں، جہانگیر ترین نے وزیراعظم کو کہا ہے کہ عوام کیلئے ڈیڑھ ارب کا نقصان برداشت کرنے کو شوگر مالکان تیار ہیں۔ذوالقرنین خان کا کہنا تھا کہ جہانگیر ترین سے 20 ہزار ٹن چینی خریدی جائے گی اور وہ 67 روپے فی کلو کی قیمت پر چینی دیں گے، جبکہ دیگر شوگر ملز مالکان 70 روپے فی کلو دیں گے، شوگر ملز مالکان کی جانب سے یہ چینی مارکیٹ کے مقابلے میں سستے داموں مل رہی ہے، مارکیٹ ریٹ 81 روپے کلو ہے جبکہ ہمیں جہانگیر ترین سے 67 روپے کلو میں چینی ملے گی۔
