لاہور(نیوزڈیسک)مسلم لیگ (ن) نے پیپلز پارٹی کی طرف سے مستقبل میں سخت رویہ اپنائے جانے کے پیش نظر سندھ میں پارٹی رہنماﺅں کو متحرک ہونے کیلئے ہدایات جاری کر دیں، (ن) لیگ کے رہنما ممتاز علی بھٹو کو سندھ بھر کادور ہ کرنے کے علاوہ ہر طر ح کی صورتحال پر کڑی نظر رکھنے کاٹاسک بھی سونپ دیاگیا ۔ذرائع نے بتایا ہے کہ آصف علی زرداری کی طرف سے قومی ادارے کےخلاف بیان بازی کے بعد وفاق کے واضح موقف سے پی پی اور (ن) لیگ کی مفاہمتی سیاست میں تعطل آ گیا ہے اور پیپلز پارٹی کی طرف سے مستقبل میں سخت رویے کا اظہار سامنے آ سکتا ہے ۔ اس حوالے سے مسلم لیگ (ن) نے بھی پیشگی تیاریاں شروع کر دی ہیں اور اسی تناظر میں سندھ میں پارٹی رہنماﺅں کو متحرک ہونے کیلئے واضح ہدایات دی گئی ہیں۔ ذرائع نے بتایا ہے کہ اس سلسلہ میں ممتاز علی بھٹو سے کہا گیا ہے کہ وہ سندھ بھر کے دورے کریں اور کسی بھی طرح کی صورتحال پر کڑی نظر رکھیں ۔ ذرائع نے بتایا ہے کہ آنے والے دنوں میں ممتاز علی بھٹو کی مسلم لیگ (ن) کی قیادت سے بھی ملاقات متوقع ہے ۔