مریدکے ( این این آئی )مسلم لیگ ن کے مرکزی رہنما ، چیئرمین پبلک اکائونٹس کمیٹی رانا تنویر حسین نے کہا ہے امریکی صدر کے دورہ پر بہت تبصرے ہوچکے ،امریکی صدر کی پاکستان کیلئے تعریف سے کام نہیں چلے گا کہیں ایسا نہ ہو ہم ٹریپ ہوجائیں ،امریکی صدر اربوں کے معاہدے اورمحبت بھارت سے کرتے ہیں اورہماری صرف تعریف کرکے ہمیں استعمال کرنا چاہتے ہیں ۔ میڈیا سے گفتگو کرتے ہوئے رانا تنویر حسین نے کہا کہ حکومت کی
خارجہ پالیسی کو تب کامیاب سمجھتے جب امریکی صدر کشمیر اور دیگر حل طلب اہم معاملات حل کرواتے ۔ انہوں نے کہا کہ نواز شریف کی صحت بہت خراب ہے ، پارٹی قیادت سمجھتی ہے کہ انہیں مکمل علاج کے بعد وطن واپس آنا چاہیے ،حکومت نواز شریف کی بیماری پر سیاست نہ کرے ۔انہوں نے کہا شہباز شریف مارچ کے آخر میں پاکستان واپس آئیں گے ،مسلم لیگ ن ہر اس تحریک کا حصہ بنے گی جس سے عوام کو حکومت سے نجات ملتی ہو۔
