لاہور( این این آئی )کورونا وائرس کی وجہ سے سعودی عرب نے عمرہ زائرین پر پابندی عائد کر دی ،علامہ اقبال انٹرنیشنل ایئرپورٹ سے سعودی عرب جانے والی پروازوں سے عمرہ زائرین کو آف لوڈ کردیا گیا ،عمرہ زائرین نے احتجاج کرتے ہوئے عملے سے توں تکرار بھی کی ۔ تفصیلات کے مطابق سعودی ایوی ایشن کی جانب سے پالیسی موصول ہونے کے بعد پی آئی اے کی مدینہ جانے والی پرواز پی کے 747 سے 300عمرہ زائرین کو آف لوڈ کر دیا گیا

جبکہ سعودی ائیر کی جدہ جانے والی پرواز ایس وی 735 سے بھی اتنی ہی تعداد میں عمرہ زائرین کو آف لوڈ کر دیا گیا ۔ عمرہ زائرین اور انکے عزیز و اقارب نے پروازوں کی روانگی نہ ہونے پر شدید احتجاج کیا جبکہ عملے سے بھی توں تکرار ہوتی رہی ۔ انتظامیہ کی جانب سے انہیں آگاہ کیا گیا کہ سعودی عرب نے پابندی لگائی ہے جس کی وجہ سے انہیں آف لوڈ کیا گیا ہے ۔ پی آئی اے کی عمرہ زائرین کو لے جانے والی دوسری پرواز پی کے 759 کو بھی روک دیا گیا ۔