گال(نیوز ڈیسک) سری لنکا کیخلاف غیر ذمہ دارانہ بیٹنگ پر ہیڈ کوچ حیرت سے دنگ رہ گئے،وقار یونس کا کہنا ہے کہ بولرز نے اپنا حق ادا کیا، بیٹسمینوں نے کام خراب کر دیا،غلط شاٹ سلیکشن کی وجہ سے میچ کے باقی 2 روز بھاری محسوس ہونے لگے۔اچھی بولنگ سے سری لنکا کو 300رنز تک محدود کیا، مگر پھر ناقص بیٹنگ سے خود اپنے لیے مسائل بھی پیدا کرلیے، ہیڈ کوچ وقار یونس نے اس کارکردگی پر سخت مایوسی کا اظہار کیا، پریس کانفرنس میں انھوں نے کہا کہ ہم بیٹنگ میں اس سے بہت بہتر کارکردگی پیش کرسکتے تھے، بدقسمتی سے خراب شاٹ سلیکشن نے کام بگاڑ دیا،اب ٹیم اس حالت میں ہے کہ باقی 2 روز کا کھیل بھی بہت بھاری محسوس ہونے لگا ہے، ہمیں نقصان کی تلافی کیلیے سخت محنت کرنا ہوگیدیگر نے اپنا مشن مکمل کیا لیکن بیٹسمین توقعات پر پورا نہیں اترے،کوچ نے کہا کہ 4بولرز کے ساتھ میدان میں اتریں تو کوئی ایک ایسا ضرور ہونا چاہیے جو چھوٹے اسپیلز میں جلد وکٹیں حاصل کرسکے، ایڈیلیڈ میں ورلڈکپ میچ کے بعد وہاب ایک مہلک ہتھیار کے روپ میں سامنے آئے اور ٹیم کیلیے اچھا پرفارم کررہے ہیں، ایک میچ ونر کا ہونا ہمیشہ ٹیم کیلیے تقویت کا باعث ہوتا ہے۔ یاد رہے کہ پیسر نے یوں تو اننگز میں 74رنز دے کر 3وکٹیں حاصل کیں لیکن ٹاپ آرڈر کا صفایا کرنے میں اہم کردار ادا کیا تھا، ان میں ایک قیمتی وکٹ سنگا کارا کی بھی تھی۔