لاہور(این این آئی)کاشانہ ویلفیئر ہوم کی سابقہ سپرنٹنڈنٹ افشاں لطیف نے اپنے مطالبات کے حق میں اور صوبائی وزیر اجمل چیمہ اور افسران کیخلاف وزیر اعلیٰ معائنہ ٹیم کے دفتر کے سامنے دھرنا دے کر احتجاج کیا، افشاں لطیف اپنے مطالبات کی تحریر پر مبنی پلے کارڈ اٹھا کر سڑک کے درمیان میں بیٹھ گئیں جس سے ٹریفک بھی سست روی کا شکار رہی۔ افشاں لطیف نے کہا کہ میں آج وہیں بیٹھ کر احتجاج کر رہی ہوں جہاں سے ظلم کی داستان شروع ہوئی تھی، مجھے آدھے گھنٹے کے نوٹس پر یہاں
بلایا جاتا تھا، مجھے بازو سے پکڑ کر کھینچا جاتا تھا۔ انہوں نے کہا کہ راحیل صدیقی اپنے محکمے کے وزیر اجمل چیمہ کے غلام بنے ہوئے ہیں اور انہیں بچانے کی کوشش کر رہے ہیں۔ انہوں نے کہا کہ یہ کیسے ثبوت چاہتے ہیں میں تو چار ماہ سے ثبوت ہاتھوں میں لئے پھر رہی ہوں اور عدالت میں بھی درخواست دائر کر رکھی ہے، ندیم وڑائچ کو بیرون ملک بھجوا دیا گیا ہے۔ انہوں نے کہا کہ جب تک کاشانہ ویلفیئر ہوم کی بچیوں اور مجھے انصاف نہیں ملتا میں اپنا احتجاج جاری رکھوں گی۔
