اسلام آباد(این این آئی)وفاقی حکومت نے نوجوانوں کو اسلامی بینکنگ کے تحت قرضوں کی فراہمی کا فیصلہ کرلیا، اس سلسلے میں گورنر اسٹیٹ بینک رضا باقر اور وزیراعظم کے معاون خصوصی عثمان ڈار کے ملاقات ہوئی جس میں کامیاب جوان پروگرام کا اسلامی بینکنگ پر مشتمل مرحلہ اپریل سے شروع کرنے کا فیصلہ کیاگیا ۔ نوجوانوں کو اسلامی بینکنگ کے ذریعے قرضوں کی فراہمی پر بریفنگ دی گئی جس کے مطابق پروگرام کے لئے تمام نجی بینکس کی خدمات حاصل کی جائینگی ۔
عثمان ڈار نے کہاکہ پہلے مرحلے کے تحت دی گئی درخواستوں کی اسکروٹنی جاری ہے،کامیاب درخواست گزاروں کو قرض کی تقسیم شروع کر دی گئی ہے۔عثمان ڈار نے کہاکہ نوجوانوں کی بڑی تعداد نے اسلامی بینکنگ کے تحت قرض کی فراہمی کا مطالبہ کیا تھا۔ عثمان ڈار نے کہاکہ گورنر اسٹیٹ بینک اور اسٹیک ہولڈرز سے مشاورت مکمل کر لی ہے،دوسرے مرحلے میں نوجوان اسلامی بینکنگ کے تحت قرض حاصل کر سکیں گے۔
