لاہور(آن لائن )مسلم لیگ ( ن ) کی ترجما ن مریم اورنگزیب نے کہا ہے کہ عمران صاحب حکومت چلانا اور عوام کی خدمت آپ کے بس کی بات نہیں، یوٹرن اور نالائقی آپ کی پہچان بن گئی، جرات ہے تو عوام کو بتائیں آٹے اور چینی کا بحران جہانگیر ترین اور خسرو بختیار کو فائدہ دینے کے لئے پیدا کیا گیا، وسیم اکرم پلس کو ایک فلور مل چیک کرنے کی توفیق بھی نہ ہو ئی ۔جمعہ کے روز ترجمان مسلم لیگ نون

مریم اورنگزیب نے ملک میں آٹے کے بحران کو عوام کی جیبوں پر حکومت کا ڈاکہ قرار دیتے ہو ئے کہا کہ گندم کی پیداوار 20 فیصد بڑھا چڑھا کر دکھائی گئی تاکہ اس ایکسپورٹ سے چند لوگ جیبیں بھر لیں، مفاد پرستوں نے 150 ڈالر فی ٹن سبسڈی بھی وفاقی حکومت سے ہتھیا کر مزید ظلم کیا، پنجاب میں بعض بدنام زمانہ کرپٹ فلور ملز، محکمہ خوراک اور اے ٹی ایمز کی ملی بھگت سے یہ ڈاکہ ڈالاگیا، ملی بھگت کے نتیجے میں افغانستان اور وسط ایشیاء و غیر قانونی طور پر گندم بھجوائی گئی۔انہو ں نے کہا کہ ڈاکے کی اس واردات کے لئے محکمہ خوراک میں اس مدت کے لئے خاص سیکریٹری کی تعیناتی کرائی گئی، وسیم اکرم پلس کو ایک فلور مل چیک کرنے کی توفیق ہوئی نہ ہی یہ معلوم کیا کہ آٹا مقامی مارکیٹ میں فراہم ہو رہا ہے یا گندم باہر بھیجی جارہی ہے، انسانی ضرورت کا جائزہ لئے بغیر ہی فیڈ ملوں کو جانوروں کی خوراک کے لئے گندم خریدنے کی اجازت دے دی گئی، اے ٹی ایمز نے بڑی مقدار میں گندم ذخیرہ کی ہوئی تھی۔