بغداد(آن لائن)عراق کے دارالحکومت بغداد کے گرین زون میں امریکی سفارت خانے کے قریب تین راکٹ حملے کئے گئے ہیں۔غیر ملکی خبر رساں ادارے کے مطابق راکٹ حملوں کے وقت امریکی سفارت خانے سے منسلک کمپلیکس سے لوگوں کو محفوظ مقامات پر پناہ لینے کے اعلانات کئے گئے۔عراقی پولیس نے بتایا کہ کٹیوشا کے تین راکٹ گرین زون کے اندر گرے ، جس میں سرکاری
عمارتیں اور کئی غیر ملکی سفارت خانے موجود ہیں۔راکٹ حملوں میں کوئی نقصان نہیں پہنچا تاہم امریکا کی جانب سے تاحال اس حوالے سے کوئی بیان سامنے نہیں آیا۔واضح رہے کہ 3 جنوری کو امریکا نے فضائی حملے کر کے ایرانی جنرل قاسم سلیمانی کو قتل کر دیا تھا جس کے بدلے میں ایران کی جانب سے 8 جنوری کو بغداد میں امریکا کے دو فوجی اڈوں پر درجنوں میزائل داغے گئے تھے۔
