اسلام آباد(آن لائن)مسلم لیگ(ن) کے رہنمامحمد زبیر نے کہاہے کہ رانا ثنااللہ کے کیس کو دیکھا جائے تو شہریار آفریدی اس سلسلے میں مسلسل جھوٹ بول رہے ہیں اور قسمیں کھا رہے ہیں، اصل کیس تو شہریا ر آفریدی اور عمران خان کے خلاف چلنا چاہئے۔ نجی ٹی وی سے گفتگو کرتے ہوئے محمد زبیر نے کہا کہ پچھلے دو تین دن سے حکومت کی جگ ہنسائی ہورہی ہے، رانا ثنااللہ کے کیس کو دیکھا جائے تو شہریار آفریدی اس سلسلے میں مسلسل جھوٹ بول رہے ہیں اور قسمیں کھا رہے ہیں، اصل کیس تو
شہریا ر آفریدی اور عمران خان کے خلاف چلنا چاہئے۔محمد زبیر کاکہنا تھا کہ اے این ایف کے چیف کاکیا تعلق ہے کہ وہ جاکر وزیر اعظم کو کیس کی تفصیلات بتائے، قانون کی بات کرنیوالے، خود قانون کااحترام نہیں کرتے۔ انہوں نے کہا کہ ہم ڈیڑھ سال سے حکومت کے فاشزم کا سامنا کررہے ہیں، ہمارے ساتھ جو حربے استعمال کئے جارہے ہیں، یہ حربے تو مارشل لاکے دوران بھی استعمال نہیں کئے گئے۔ انہوں نے کہا کہ اداروں کو استعمال کرکے اپوزیشن کوہر طرح سے ڈرانے کی کوشش کی جاتی ہے۔
