اسلام آباد(آن لائن )پاکستان بیت المال اسلام آبا د میں مخصوص افراد کو بھرتی کرنے کی تیاریاں شروع کر دی گئیں جبکہ ادارے کے قوانین ،قوائد و ضوابط کی خلاف ورزی کرتے ہوئے بھرتی کے لئے اشتہار بھی جاری کر دیا گیا ۔

ذرائع کے مطابق بیت المال میں ڈپٹی ڈائریکٹر کی سیٹ پر من پسند افراد کو بھرتی کرنے کے لئے قوانین کو ہی تبدیل کر دیا ہے، ذرائع نے بتایا کہ پاکستان بیت المال میں ڈپٹی ڈائریکٹر کی آسامی موجود ہی نہیں گریڈ 17کا اسسٹنٹ ڈائریکٹر ہی ڈپٹی ڈائریکٹر کے چارج پر زمہ داریاں سنبھال سکتا ہے ،ادارے میں ڈپٹی ڈائریکٹر کی آسامیوں پر برائے راست گریڈ 18میں بھرتی قوائد کے مطابق ممکن ہی نہیں اس کے باوجود با اثر افسران کی ملی بھگت سے من پسند شخص کی بھرتی کے لئے عمر کی حد بھی 10سال کم کر دی گئی ہے، ذرائع کے مطابق اس غیر قانونی بھرتی کے لئے ادارے کے مینجنگ ڈائریکٹر کو بھی اعتماد میں نہیں لیا گیا اور وہ اصل صورتحال سے بے خبر ہیں، ذرائع نے یہ بھی بتایا کہ بیت المال کی65ویں بورڈ میٹنگ میں بھی یہی فیصلہ ہوا تھا کہ ڈپٹی ڈائریکٹر کی پوسٹ پر نئی بھرتی کے بجائے ادارے سے پروموٹ افیسر ہی ڈیوٹی سرانجام دے گا لیکن ادارے کے کرپٹ افسران نے اپنے من پسند افرادکی غیر قانونی بھرتی کے لئے ہاتھ پاوں مارنے شروع کر دیئے ہیں۔