لاہور(این این آئی )مسلم لیگ (ن) پنجاب کی ترجمان عظمیٰ بخاری نے کہا ہے کہ کٹھ پتلی وزیراعظم چھ دن سے لاپتہ ہیں،ایک فون کال سے دورہ ملائیشیا ملتوی کرنے والا وزیراعظم مضبوط نہیں ہو سکتا،دنیا آگے جارہی ہے عمران نیازی ملک کو پیچھے لے کر جارہے ہیں۔

اپنے ایک بیان میں انہوں نے کہاکہ نااہل حکمرانوں نے ملک کو عالمی طور پر تنہا کردیا ہے۔کشمیر سمیت کسی ایشو پر مسلم ممالک پاکستان کا ساتھ نہیں دے رہے۔ترکی ،ملائیشیا اور ایران نے مغرب کی مخالفت کے باوجود کشمیر پر پاکستان کا ساتھ دیا۔لیکن نالائق وزیراعظم نے ایک فون کال پر قابل بھروسہ تینوں دوست ممالک کو دوکھ دیا ہے۔انہوں نے مزید کہا پاکستان کے حالات آج قابل رحم ہو چکے ہیں۔کوئی دوست ملک ہمارے ساتھ نہیں کھڑا۔حکومت کی خارجہ اور داخلہ پالیسی کی نظر نہیں آرہی۔حکومتی ترجمانوں کو صرف جھوٹ اور پروپیگنڈے کرنے کا ٹاسک ملتا ہے۔کسی حکومتی کے پاس کوئی تجربہ اور ویژن نہیں ہے۔پارلیمنٹ کو بے توقیر کردیا گیا ہے۔حکومتی کی سنجیدگی کا عالم یہ ہے کہ آرمی چیف کی توسیع کا نوٹیفکیشن بنانے میں تین دن لگ جاتے ہیں پھر بھی ایک ٹھی نوٹیفکیشن نہیں بنا سکے۔ڈکٹیٹر مشرف کی جس طرح اس غیر جمہوری حکومت نے کھل کر حمایت کی ہے اس سے صاف ظاہر ہوتا ہے کہ پاکستان میں آج بھی مشرف کی باقیات ہی برسر اقتدار ہیں۔