نوٹنگھم (نیوز ڈیسک)انگلینڈ اور نیوزی لینڈ کی کرکٹ ٹیموں کے درمیان چوتھا ون ڈے میچ (آج) بدھ کو ٹرینٹ برج، نوٹنگھم میں کھیلا جائے گا ¾ میچ ڈے اینڈ نائٹ ہوگا اور پاکستانی وقت کے مطابق شام چھ بجے شروع ہوگا۔ انگلش ٹیم ایون مورگن کی قیادت میں میدان میں اترے گی جبکہ کیوی ٹیم کی کپتانی کے فرائض برینڈن میک کلم انجام دیں گے۔ انگلینڈ کی ٹیم نے پہلے میچ میں کیویز کو 210 رنز سے شکست دیکر سیریز میں 1-0 کی برتری حاصل کی تھی، دوسرے میچ میں کیویز نے شاندار کم بیک کرتے ہوئے میزبان ٹیم کو 13 رنز سے شکست دیکر سیریز 1-1 سے برابر کر دی تھی، تیسرے میچ میں کیویز نے انگلینڈ کو 3 وکٹوں سے شکست دیکر سیریز میں 2-1 کی برتری حاصل کرلی ہے۔ اس سے قبل دونوں ٹیموں کے درمیان کھیلی گئی دو ٹیسٹ میچوں کی سیریز 1-1 سے برابری پر ختم ہوئی تھی۔ دونوں ٹیموں کے درمیان ون ڈے سیریز کا پانچواں اور آخری ون ڈے 20 جون کو چیسٹرلی سٹریٹ میں کھیلا جائے گا۔ادھر نیوزی لینڈ کرکٹ ٹیم کے کپتان اور جراح مزاج بلے باز برینڈن میکولم نے کہا کہ انگلینڈ کے خلاف مسلسل تیسری کامیابی حاصل کرکے سیریز 3-1 اپنے نام کرینگے۔ انہوں نے کہا کہ پہلے ون ڈے میں شکست کے بعد مسلسل دو میچوں میں کامیابی ٹیم کی اجتماعی کوششوں کا نتیجہ ہے، کیویز نے سیریز کے تیسرے میچ میں انگلینڈ کو 3 وکٹوں سے شکست دی تھی۔ کیویز ٹیم کے کپتان نے کہا کہ انکی ٹیم مکمل طور پر فٹ اور بھر پور فارم میں ہے اور انگلینڈ کے خلاف چوتھے ون ڈے میچ کے لیے میدان میں اترنے کو بے تاب ہے۔ انگلینڈ کرکٹ ٹیم کے کپتان ایوان مورگن نے کہا کہ کیویز ٹیم کے ہاتھوں مسلسل دو میچوں میچ میں شکست کے باوجود انکی ٹیم کے حوصلے پست نہیں ہوئے، انہوں نے کہا کہ سیریز کے چوتھے میچ میں مہمان ٹیم کے خلاف کامیابی حاصل کرکے سیریز میں شاندار کم بیک کرینگے۔