لاہور(این این آئی) صوبائی وزیر اطلاعات وثقافت فیاض الحسن چوہان نے کہا ہے کہ آئین کی منسوخی نہیں، معطلی ہوئی، اسمبلیاں موجود تھیں، عدالتی فیصلے سے قوم حیران و پریشان ہے، پاکستان کیلئے تین جنگیں لڑنا والا کیسے غدار ہوسکتا ہے۔صوبائی وزیر اطلاعات فیاض الحسن چوہان نے پنجاب اسمبلی کے احاطے میں میڈیا سے گفتگو کرتے ہوئے کہاکہ افواج پاکستان کو مشرف کیس کے فیصلے سے جھٹکا لگا ہے،

ایمرجنسی لگانے والے مشرف اکیلے نہ تھے،شوکت عزیز اور زاہد حامد کہاں ہیں؟ اس وقت کی کابینہ اور گورنرز کہاں گئے؟ آئین کے تحت دیگر شامل افراد کیلئے بھی سزا ہے، 2010 میں بننے والے قانون کا اطلاق 2007 کے فیصلے پر کیسے ہوسکتا ہے، افواج پاکستان کی قربانیاں کسی سے ڈھکی چھپی نہیں۔فیاض الحسن چوہان کا کہنا تھا آرٹیکل 6 سیکشن 2 میں واضح ہے مدد کرنیوالے بھی مجرم ہیں، آئین کا آرٹیکل 6 تین سب آرٹیکلز پر مشتمل ہے، پرویز مشرف نے پاکستان کیلئے 3 جنگیں لڑیں، مشرف نے بھارتی میڈیا پر پاکستان کی سلامتی و خودمختاری کی جنگ لڑی۔صوبائی وزیر نے کہا کہ بلاول بھٹو کو کہنا چاہتا ہوں کہ انکے والدہ نے بھی مشرف کے اقدام کی حمایت کی تھی۔بلاول بھٹو مشرف کیس کے فیصلے پر خوشیاں منا رہے ہیں انکو معلوم ہونا چاہیے کہ مشرف کے اقدام کو 1999 میں اس کی حمایت کی تھی۔ایک سوال کے جواب میں فیاض الحسن کا کہنا تھا کہ یہ نیا پاکستان ہے جہاں احسان نیازی کے خلاف ایف آئی آر درج کی گئی اور گرفتاری کے لیے چھاپے مارے جارہے ہیں۔انہوں نے کہاکہ جس ملک میں کرپشن عام ہو جائے اس ملک کی سکیورٹی خدشات کا شکار ہو جاتی ہے۔ معاشی دہشت گرد ضمانت لے کر باہر آرہے ہیں، معاشی دہشت گرد، نواز شریف، شہباز شریف، آصف زرداری، خورشید شاہ اور دیگر نے کرپشن سے ملک کی سکیورٹی کو نقصان پہنچایا۔ انہوں نے کہاکہ پاکستان کی عدالتیں اور ادارے پاکستان میں اتحاد و اتفاق کی بات پر گامزن ہے۔