فتح اللہ(نیوزڈیسک) نئے بھارتی کپتان ویرات کوہلی نے آئی سی سی سے مطالبہ کیا ہے کہ بارش سے متاثرہ ٹیسٹ میچ کےلئے بھی اضافی دن رکھا جائے ۔ میڈیا سے گفتگو کرتے ہوئے بھارتی کپتان نے کہا کہ آئی سی سی کو چاہیے کہ وہ ایک روزہ میچوں کی طرح بارش سے متاثرہ ٹیسٹ میچوں کےلئے بھی ایک اضافی دن رکھے ۔ انہوں نے کہاکہ بعض اوقات میچ فیصلہ کن مرحلے میں داخل ہوجاتا ہے مگر بارش کے باعث میچ کا نتیجہ ڈرا کی صورت میں نکلتا ہے ۔ انہوں نے تجویز پیش کرتے ہوئے کہاکہ میچ ریفریز کو چاہیے کہ وہ میچ کی صورتحال کو دیکھتے ہوئے ایک اضافی دن مقرر کریں تاکہ کسی ٹیم کو نقصان نہ ہو اگر ہم یہ میچ جیت جاتے تو ہماری ٹیسٹ رینکنگ میں پوزیشن بہتر ہوجاتی مگر میچ بارش کے باعث ڈرا ہونے کی صورت میں ہمیں چوتھی پوزیشن پر دھکیل دیا گیا ۔ واضح رہے کہ سابق بھارتی کپتان ساروگنگولی نے بھی ویرات کوہلی کے اس بیان کو سراہتے ہوئے آئی سی سی سے ریزروڈے کی اپیل کی ہے ۔