لاہور(این این آئی) احتساب عدالت نے پیرا گون ہائوسنگ سکینڈل میں گرفتار مسلم لیگ (ن) کے رہنما خواجہ سعد رفیق اور خواجہ سلمان رفیق کے جوڈیشل ریمانڈ میں مزید10روز کی توسیع کر دی ،کارکنوں اور وکلاء سے ملنے سے روکنے پر خواجہ سعد رفیق برہم ہو گئے اورپولیس کا حصار توڑ دیا،

صحافیوں کو بھی کمرہ عدالت سے باہر نکال دیا گیا ۔ احتساب عدالت کے ڈیوٹی جج امیر محمد خان نے خواجہ برادرن کے خلاف پیراگون ہائوسنگ سکینڈل کی سماعت کی۔عدالت نے خواجہ برادران کو دوبارہ 9 دسمبر کو پیش کرنے اور آئندہ سماعت پر گواہ قیصر امین بٹ اور جوڈیشل مجسٹریٹ ذوالفقار باری کو دوبارہ طلب کر لیا ۔پولیس کی جانب سے خواجہ برادران کو میڈیا اور کارکنوں سے گفتگو کرنے سے روکنے کے لئے میگا فون کا بے دریغ استعمال کیا گیا جس سے کانوں پڑی آواز سنائی نہیں دے رہی تھی۔ پولیس کی جانب سے خواجہ برادرا کو تین درجاتی سکیورٹی کے حصار میں کمرہ عدالت میں لایا گیا ۔ پولیس نے کارکنوں اور وکلاء کو خواجہ سعد رفیق اور خواجہ سلمان رفیق سے ملاقات سے روک دیا جس پر خواجہ سعد رفیق غصے میں آ گئے اور انہوں نے پولیس کا حصار توڑ کر وکلاء کو زبردستی اپنے قریب کر لیا اور کمرہ عدالت میں لے گئے ۔ پولیس کی جانب سے صحافیوں کو بھی کمرہ عدالت سے باہر نکال دیا گیا۔ خواجہ سعد رفیق نے کمرہ عدالت میں داخل ہوتے ہوئے بلند آواز میں کہا کہ آپ نے اپنے حقوق کیلئے لڑتے رہنا ہے ۔