پیرس(نیوزڈیسک )یوئیفا یورپین چیمپئن شپ 2016 کے کوالیفائنگ میچ یورپ کے مختلف شہروں میں جاری ہیں، انگلینڈ، اسپین اور سوئٹزرلینڈ نے میچ جیت لئے جب کہ روس کو شکست کا سامنا کرنا پڑا۔ انگلینڈ نے سلووینیا کو دلچسپ مقابلے میں تین دو سے شکست دی، سلووینیا کی طرف سے نوواک وِچ اورپیک نِک نے ایک ایک گول کیا، انگلینڈ کی طرف سے ولشیئر نے دو گول کئے، وائن رونی نے چھیاسی ویں منٹ میں فیصلہ کن گول کرتے ہوئے ٹیم کو فتح دلائی۔ بیلاروس کی کمزور ٹیم نے اسپین کا سخت مقابلہ کیا تاہم کھیل کے پینتالیسویں منٹ میں سِلوا کے گول کی بدولت اسپینش ٹیم ایک گول سے جیتنے میں کامیاب رہی۔ سوئٹزرلینڈ نے لیتھوانیا کو دو ایک سے شکست دی جب کہ روس کو آسٹریا کے ہاتھوں ایک گول سے شکست کا سامنا کرنا پڑا، میچ کا واحد گول جانکو نے تینتیسویں منٹ میں کیا۔ سلوواکیہ، سویڈن، استونیا اور یوکرائن نے بھی اپنے میچ جیت لئے۔