پشاور(این این آئی)خیبرپختونخوااسمبلی میں حکمران جماعت پی ٹی آئی کے اراکین نے سینیٹ کے ضمنی انتخابات میں ہارس ٹریڈنگ کے تاثرکویکسرمستردکرتے ہوئے اپنی جیت کے عزم کااظہارکیا۔سپیکرصوبائی اسمبلی مشتاق احمدغنی نے میڈیاسے گفتگومیں کہاکہ وزیراعظم عمران خان نے گزشتہ سینیٹ الیکشن میں

20ارکان کو سزا دی،خان صاحب کی سزا کے بعد کوئی رکن ووٹ بیچنے کاسوچ بھی نہیں سکتا بلکہ اپوزیشن کے کچھ ارکان ہمارے ووٹ بینک میں اضافہ کرینگے،وزیربلدیات شہرام ترکئی کاکہناتھاکہ ہمارے پاس دوتہائی اکثریت ہے جیت ہمارے ہی امیدوار کی ہوگی، ہمیں کوئی مسئلہ نہیں جلد ہی جیت کا اعلان ہوگا،یہ پیپلز پارٹی کی سیٹ تھی، اب یہ پی ٹی آئی کی ہوگی،پیپلز پارٹی کے سینٹر کے بیٹے نے پی ٹی آئی میں شمولیت کی تب انہیں ٹکٹ دیا گیا،ذیشان خانزادہ نے پی ٹی آئی جوائن کی ہے اب وہ قوم کی خدمت کریں گے،انہوں نے کہاکہ بلدیاتی انتخابات جلد کروانا چاہتے ہیں جس کے لیے تمام تر تیاریاں مکمل کرلی گئی ہیں، دوسری جانب پی پی کے امیدوارفرزندعلی وزیر کاکہناتھاکہ ہارجیت ہوتی رہتی ہے لیکن میدان خالی نہیں چھوڑینگے پی ٹی آئی نے ارکان اسمبلی سے ووٹ کیلئے حلف لیا پی ٹی آئی کو شرم آنی چاہئے ان کو اپنے ہی ارکان پربھروسہ نہیں۔قبل ازیں میڈیاسے گفتگوکرتے ہوئے پی پی کی نگہت اورکزئی نے کہاکہ پوزیشن کی صفوں کے چارسے پانچ اراکین ضمنی انتخابات کے موقع پر پھسل گئے وہ پارٹی چیئرمین کویہ نام ارسال کرینگے تاہم وہ میڈیاکے سامنے انکانام نہیں لے سکتے۔تحریک انصاف نے ہارس ٹریڈنگ کی ترویج کی ہے ایک اورلوٹے کااضافہ ہوا ہے عوام کو تحریک انصاف کی حقیقت کاپتہ چل گیاہے۔