کوئٹہ(آن لائن) بلوچستان میں مکران کوسٹل ہائی وے پر ٹریفک حادثہ پاک بحریہ کے اہلکاروں سمیت 9افراد شہید جبکہ29زخمی ہوگئے جنہیں فوری طور پر ہسپتال منتقل کردیا گیا 5کی حالت نازک بتائی جاتی ہے لیویز حکام کے مطابق حادثہ کراچی سے تقریبا 270 کلومیٹر دور بلوچستان کے ضلع لسبیلہ کی حدود میں مکران کوسٹل ہائی وے پر بزی ٹاپ کے مقام پر پیش آیا
جہاں اورماڑہ سے کراچی کی طرف جانے والی مسافر بس گہری کھائی میں جا گری۔ اسسٹنٹ کمشنر بیلہ جمیل بلوچ کے مطابق بس میں سوار تمام 38 افراد پاک بحریہ کے اہلکار اور ان کے اہلخانہ تھے جو چھٹیاں ملنے کے بعد گوادر کے علاقے اورماڑہ میں قائم بحریہ کے اڈے سے کراچی جارہے تھے۔ جمیل بلوچ نے بتایا کہ حادثے کی اطلاع ملتے ہی پاک فوج، پاک بحریہ ، کوسٹ گارڈ ،ضلعی انتظامیہ اور لیویز فورس کے اہلکار موقع پر پہنچ گئے۔ لاشوں اور زخمیوں کو اورماڑہ میں قائم بحریہ کے درمان جاہ ہسپتال منتقل کیا گیا۔اورماڑہ میں موجود کوسٹ گارڈ کے ایک اہلکار نے بتایا کہ کئی زخمیوں کی حالت تشویشناک ہے جنہیں ابتدائی طبی امداد دینے کے بعد ہیلی کاپٹر کے ذریعے کراچی منتقل کیا جارہا ہے۔ انہوں نے بتایا کہ ہلاک ہونے والے افراد کی شناخت کا عمل جاری ہے جس کے بعد ان کی لاشیں آبائی علاقوں کو روانہ کردی جائیں گی۔650 کلومیٹر طویل مکران کوسٹل ہائی وے کراچی کو بلوچستان کے ساحلی شہر گوادر سے ملاتی ہے۔ اورماڑہ اور بیلہ کے درمیان بزی ٹاپ کے خطرناک موڑ پر اس سے قبل بھی کئی ہولناک حادثات پیش آچکے ہیں۔
