راولپنڈی(اے این این ) وزیر ریلوے شیخ رشید نے کہا ہے کہ ہائیکورٹ کا فیصلہ قانون کی جیت ہے، سوشل میڈیا پر ڈیل کا تاثر دیا گیا جو درست نہیں، اگلے 2 سے 3 ماہ اہم ہیں، پھر حالات بہتر ہو جائیں گے،عدالت نے حکومت اور نوازشریف دونوں کی عزت رکھ لی ہے۔

راولپنڈی ریلوے سٹیشن پر سٹیم انجن سپیشل سفاری ٹرین کے افتتاح کے موقع پر وفاقی وزیر ریلوے شیخ رشید کا میڈیا سے گفتگو میں کہنا تھا کہ پاکستان کی سیاست میں خوشگوار دور آنا والا ہے۔وزیر ریلوے کا کہنا تھا کہ عمران خان کا ایجنڈا ہے کسی چور کو نہیں چھوڑنا، اللہ تعالی نوازشریف کو صحت دے، شریف برادران کو باہر بھجوانے میں کسی کا کردارنہیں، نہ ڈیل ہوئی ہے نہ ڈھیل ہوئی ہے، انہوں نے حلفیہ بیان دیا ہے کہ 4 ہفتہ بعد علاج کے بعد واپس آئیں گے، انہیں 4 ہفتوں کے لئے اجازت مل گئی ہے اور ہائی کورٹ نے جانے کی اجازت دی، یہ نہ نوازشریف کی جیت ہے اورنہ ہماری ہار ہے، یہ قانون کی فتح ہے، عدالت نے دونوں پارٹیوں کی عزت کو بحال رکھا۔ یہ بہت کنجوس ہیں،یہ لوگ سمجھتے ہیں کفن کے ساتھ جیبیں بھی لگی ہوئی ہیں۔ شریف خاندان سعودی عرب جاتے وقت حمزہ شہباز کو ضمانت پر رکھ کر گئے تھے۔انہوں نے کہا کہ نواز شریف نے حلفیہ بیان دیا ہے کہ 4 ہفتے بعد علاج کروا کر واپس آہیں گے، مولانا فضل الرحمن نے پوری کوشش کرکے دیکھ لیا مگر کچھ نہ مل سکا،وہ کسی کے کہنے پر نہیں اپنی مرضی سے واپس گئے ہیں،انہیں تو جانا ہی تھا، انہیں تو جلدی جانا تھا تاہم 2 دن مزید رکنے پر انہیں داد دیتا ہوں، سیاست ٹائمنگ بہت اہم ہوتی ہے ، آصف علی زرداری کے کیس میں پلی بارگین کے لیے 5 لوگ لگے ہوئے ہیں، 15 جنوری سے حالات بہتر ہو جائیں گے، ریلوے میں 80 لاکھ پیسجنرز بڑھائے ہیں۔