ڈی آئی خان(آن لائن) کلاچی باچا آباد کے قریب دہشتگردوں نے سیکیورٹی اہلکاروں پر حملہ کردیا، حملے میں 2 اہلکار شہید اور 3 شہری زخمی ہوگئے۔ میڈیا رپورٹس کے مطابق ڈیرہ اسماعیل خان کے علاقے کلاچی باچا آباد کے قریب دہشتگردوں نے سیکیورٹی اہلکاروں پر حملہ کردیا۔ بتایا گیا ہے کہ دہشتگردوں کی فائرنگ سے
2 اہلکار شہید اور 3 شہری زخمی ہوگئے ہیں۔حملے کی اطلاع ملتے ہی سیکیورٹی فورسز جائے واقعہ پر پہنچ گئیں، فورسز نے علاقے کی ناکہ بندی کردی اور دہشتگردوں کی تلاش کیلئے سرچ کا عمل سخت کردیا ہے۔ میتوں اورزخمیوں کو ڈسٹرکٹ ہسپتال منتقل کردیا گیا ہے۔ دوسری جانب وفاقی وزارت داخلہ نے بھی سربراہ جے یوآئی ف مولانا فضل الرحمان کے آزادی مارچ سے متعلق تھریٹ الرٹ جاری کیا تھا کہ مولانا فضل الرحمان پر دہشتگرد حملہ ہوسکتا ہے۔دہشتگرد حملے کیلئے بارود سے بھری گاڑی استعمال ہوسکتی ہے۔ فضل الرحمان کی سکیورٹی بڑھانے کی سفارش کی ہے۔ وزارت داخلہ نے پنجاب، خیبرپختونخواہ اور اسلام آباد کے ہوم سیکرٹریز اورآئی جیز کو بھی آگاہ کردیا تھا۔ واضح رہے ڈیرہ اسماعیل خان بھی جمیعت علماء اسلام (ف) کا سیاسی گڑھ ہے۔ جہاں مولانا فضل الرحمان کی جماعت کی بیحد مقبولیت ہے۔لیکن اس کے باوجود مولانا فضل الرحمان الیکشن میں اپنی پکی نشستیں گنوا بیٹھے۔ مولانا فضل الرحمان نے الیکشن میں دھاندلی کا الزام عائد کیا اور بالاآخر دوسری جماعتوں کو بھی حکومت کے خلاف ایک پلیٹ فورم پر اکٹھا کرنے میں کامیاب ہوگئے۔ جس کے نتیجے میں اپوزیشن کی نو اپوزیشن جماعتوں نے رہبر کمیٹی تشکیل دی اور رہبر کمیٹی کے متفقہ فیصلے کی روشنی میں آزادی مارچ کیا گیا۔
